Покрај проблемот со Бугарија, зошто Македонија нема да добие датум за преговори за членство со ЕУ, е тоа што голем број на земји членки на ЕУ не се убедени дека Македонија треба да започне преговори бидејќи сметаат дека земјава не е подготвена во делот со борбата против корупцијата, вели потпретседателот на ВМРО-ДПМНЕ, Александар Николоски, за Клик Плус на Тв 21.
Според Николоски тоа е еднакво проблематично колку Бугарија затоа што не е единствена одлука која што се носи во ЕУ таа за проширување со консензус, на годишно ниво, десетина, стотици одлуки се носат со консензус, така функционира ЕУ.
- Доколку сите земји челнки на ЕУ се убедени дека Македонија треба да почне преговори за членство ќе и речат на Бугарија видете ако правите проблем со Македонија ние ќе ви направиме проблем на десет други одлуки каде што вие имате интерес, ама тоа не и го велат затоа што не се убедени. Ова се двете причини зошто Македонија оваа година нема да добие датум за преговори. За ова е одговорен целосно Зоран Заев, рече Николоски.
Тој додаде дека Бугарија нема влада, а на 11 јули ќе има пак избори на кои се очекува сличен исход, а во декември претседателски, што значи дека оваа година датумот е изгубен, истакна Александар Николоски.