Најновиот извештај на Евростат за куповната моќ го отвори новото политичко препукување меѓу власта и опозицијата. Премиерот Христијан Мицкоски оцени дека податоците ја демантираат опозицијата, тврдејќи дека Македонија не е на дното на европската листа, туку е пред сите земји од регионот и пред неколку членки на Европската Унија.
„Македонија не е најслаба, туку е подобра од неколку земји од Европската Унија и пред сите земји од регионот кога станува збор за куповната моќ на граѓаните“, изјави премиерот.
Тој додаде дека според него е видлив напредокот во однос на состојбата од пред три до четири години, но нагласи дека Владата не е задоволна со постигнатото и ќе продолжи да работи на подобрување на животниот стандард.
„Ако тоа се спореди со бројките од пред три-четири години, може да се забележи значаен напредок. Дали е тоа доволно? Не е. Ќе продолжиме уште повеќе и уште подобро да работиме за граѓаните и за државата“, рече Мицкоски.
Премиерот додаде дека, според него, опозицијата ќе продолжи со, како што кажа, „конструкции и лаги“, додека Владата ќе остане фокусирана на реализација на своите политики и економскиот развој на земјата.
© Vecer.mk, правата за текстот се на редакцијата
