Изјавата на сведокот во случајот „Топлик“ покажува дека се потврдува тврдењето на ВМРО-ДПМНЕ, искажано уште пред 3 години дека случајот е политички прогон од страна на власта и нивните луѓе во правосудството,  вели адвокатот Тони Менкиноски.

Ова го изјави Менкиноски, после вчерашното  тензично рочиште во Кривичниот суд  за случајот „Топлик“, особено по сведочењето на Анета Јорданова вработена во Министерството за транспорт и врски околу тоа што изјави дека трпела и закани од државниот правобранител.

-Денешната изјава на сведокот во случајот „Топлик“ само го докажува тврдењето на ВМРО-ДПМНЕ изнесено пред три години за овој случај дека постои „политички прогон“ од страна на актуелната власт и нејзините гавази од „правосудството“. За каква „правда“ сега ние ќе зборуваме! Обидот за „ злоупотреба на правдата“ на Јавниот обвинител Бурим Рустеми заедно со секретарот на Владата Рашкоски, државниот правобранител и претставници од Министерството за транспорт не смее да остане неказнет! – рече Менкиноски за Курир.

Според него конструирањето на докази со кои се сака да се осудат лица кои ништо не сториле, невините да се прикажат како виновни е својствено само на тоталитаристички режим кој за жал владее во Македонија.

Тој додава дека во случајот „Топлик“ вистината излезе на површина, прашање е на време кога ќе излезат вистините за другите „политички предмети“ кои ги конструирале овие квислинзи. Убеден сум и апсолутно сигурен, дека сите вакви обиди ќе бидат казнети кога ќе завладее правото во Македонија, а тоа ќе биде многу брзо откако ќе го паднеме овој режим.

Претходно  сведокот Јорданова денеска во судот објасни дека договорот бил раскинат во договор помеѓу Државниот правобранител и фирмата и оти не била направена штета по буџетот на РМ.

Но, на средбата во Владата која се одржала во кабинетот на поранешниот генерален секретар на Владата Драги Рашковски таа трпела закани од државниот правобранител Фахми Стафа, а пак обвинителот Рустеми ѝ појаснувал дека доколку нема побарувања и штета по буџетот, предметот ќе падне.

На Јорданова ѝ побарале да направи прецизирање на имотно-правните побарувања, иако таа не се согласувала со тоа бидејќи во предметот се наоѓале сите докази кои ѝ се потребни на Комисијата за спроведување на јавни надавања.

Таа е јасна дека постои повреда на постапката и оти нема штета во предметот.

Во предметот немаше прекрушување дека е направена штета по буџетот на РМ – јасна е Јорданова.

Но, таа таа трпела притисоци од Кабинетот на Заев дека ќе ја избркаат од работа доколку не достави нов допис во кој ќе наведе дека има штета по буџетот.

На тоа судијата Османи ја праша дали била навистина избркана од работа, таа рече дека не е бидејќи го потпишала дописот.

ВМРО-ДПМНЕ уште во 2018 година укажа на притисоците во Топлик и дека нема материјална штета.

-Во рацете држам еден допис кој е од министерот за транспорт и врски, Сугарески. Во овој допис Сугарески образложува дека во предметот „Топлик“ нема материјална штета, рече на прес-конференција Тони Менкиноски, претседател на правната комисија при ВМРО-ДПМНЕ во 2018 година.

Како што наведе претставникот на опозициската партија, дополнително министерот Сугарески образложува дека штетата што е претпоставена од страна на јавното обвинителство нема да ја побаруваат.

„И дотолку повеќе, господинот Сугарески во крајната сентенца на неговиот допис наведува дека со постапката што се водела се заштитени имотните интереси и права на Република Македонија“, рече Менкиноски.

Тој го искористи пресот да упати порака и прашања до одредени релевантни институции во Република Македонија, кои, како што рече, малтретирале со таканаречени процеси, како што е процесот „Топлик“.

„Зошто и од која причина го премолчуваат овој доказ, особено СЈО, кое има обврска согласно со Законот за кривична постапка да ги достави сите докази кои се во штета, но и во полза на обвинетите. Да не заборавиме, една од улогите на јавното обвинителство согласно со законот е и да ги штити основните човекови права на обвинетите“, наведе претседателот на правната комисија при ВМРО-ДПМНЕ.

Како што кажа Менкиноски, со дописот кој е доставен, односно со откажувањето на Министерството за транспорт и врски за оштетно побарување не постои кривично дело.

„Ние повеќе немаме предмет. Јас не знам и од која причина јавното обвинителство сè уште го нема откажано гонењето по овој предмет и зошто го нема информирано судот и го нема повлечено обвинителниот акт“, подвлече тој и додаде дека е важно во целата постапка овој прогон да заврши бидејќи доказите се круцијални и битни за целиот предмет.

Случајот „Топлик“ на специјалното јавно обвинителство, каде што првоосомничен е ексминистерот за транспорт и врски Миле Јанакиески, се однесува на продажба на државно земјиште за изградба на комплексот „Сончев град“ во Сопиште.