Со последната измена јавно ќе бидат познати сите наши сонародници од Република Северна Македонија кои се стекнале со бугарско државјанство во последните 22 години врз основа на докажано бугарско потекло и декларација за бугарска самосвест, рече бугарскиот европратеник Андреј Ковачев.
Бугарските парламентарци, претходно без дебата ги разгледаа и поминаа на прво читање предлог измените на Законот за бугарско државјанство, поднесен од лидерот на Преродба Костадин Костадинов и група пратеници од 10 мај годинава, како и тие на Николај Алгафари (ГЕРД-СДС) и група народни пратеници и Радомир Чолаков (ГЕРБ-СДС) и група народни претставници.
Гласањето на измените го поздрави и бугарскиот европарламентарец Андреј Ковачев, порачувајќи дека неговата лична битка повеќе од десет години е на пат, конечно да стане реалност. Тој на Фејсбук објави дека церемонијата за добивање бугарско државјанство ќе биде свечена и јавна, а регистарот на сите приматели на бугарско државјанство станува јавен.
Така, овие над 120.000 македонски Бугари, меѓу кои и многу поранешни и сегашни политичари, пратеници, министри, градоначалници, раководители на сектори, раководители на партии, сопственици на медиуми и телевизии, новинари, коментатори, како и нивните семејства ќе бидат јавно заштитени од говорот на омраза и дискриминацијата на македонските институции поради тоа што се чувствуваат Бугари. Очекувам брзо усвојување на второто читање на измените на законот, изјави Ковачев.
© Vecer.mk, правата за текстот се на редакцијата
