Осквернавени бистите на Анте Поповски и на Славко Јаневски во Струга. Бистата на Анте Поповски е пронајдена во Охридското Езеро, додека бистата на Славко Јаневски била оштетена и превртена.
Реагираа од Струшките вечери на поезијата од каде што апелираат на елементарна почит кон ликот и делата на македонските поети што се вградија во основањето на еден од најпознатите светски поетски фестивали.
- Не сакаме да претпоставиме дека аналфабетите вандали што го извршија овој чин воопшто имаат претстава дека денес 1 октомври се навршуваат 18 години од смртта на Анте Поповски, велат тие.
- Најостро го осудуваме вандалскиот чин на сквернавење на бистата на еден од најистакнатите македонски поети Анте Поповски, којашто беше откорната и фрлена во крајбрежјето, соопштија од СВП.
Информацијата ја потврди портпаролот на СВР Охрид Стефан Димоски посочувајќи дека полициски службеници извршиле увид и се работи на расчистување на случајот.
– Настанот е пријавен во ОВР Струга, полициски службеници веднаш излегоа на терен да извршат увид на лице место. Полицијата работи на расчистување на случајот и откривање на сторителите, изјави Димоски.
