Официјално, повод за демонстрациите беше пресудата за убијците на децата и рибарот кај Смилковско езеро, познато како случај Монструм, но демонстрациите покажаа дека се етнички мотивирани со пораки за насилство и непочитување на државата и државните институции кога се етничките мотиви во прашање.
Протестите започнаа од Чаир и требаше да продолжат кон судот и владата, но полицијата ги сопре демонстрантите кај Мавровка поради проценка дека се можни провокации и тие останаа на локацијата кај Бит Пазар. Иако организаторите на протестот со редари и со молење се обидуваа да ги смират демонстрантите, дел од нив во неколку наврати ја нападнаа полицијата.
Само 15 минути по првиот напад врз полицискиот кордон, во кој беше повреден и помлад полициски службеник, дел од толпата на протестот започна нов обид за пробивање на полицискиот ѕид. Повторно дел од помладите учесници ја нападнаа полицијата, се фрлаа предмети и камења, се удираше со нозе, но беше возвратено со палки и нападот беше одбиен.
Организаторите на протестот повикуваат на смиреност, но ситуацијата на моменти екслира.
Во моментот се слушнаа и истрели, за што објавија и порталите кои имаа репортери на настанот, а полицијата ги тера демонстрантите да се повлечат кон Чаир.
На почетокот на протестот на браниците на полицијата беа закачени плакати со судијката Кацарска, обвинителите Фетаи, Русковска и Јовески за кои велат се корумпирани.
На друг транспарент, пак, беа наредени македонските политичари, меѓу кои и Бранко Црвенковски.
Демонстрантите вееја албански и американски знамиња, и како и на претходните протести – знаме на „Голема Албанија“.
Организаторите се криеа зад одговорноста, по испорачаните барања го прогласија протестот за Монструм за завршен, но дел демонстрантите одбиваа да се повлечат и фрлаа со камења, шишиња и различни предмети кон полицискиот кордон. Засега се знае дека повредени се тројца полициски службеници, а нападната беше и новинарската екипа на МИА.
Полицијата ги растури насилните групи и ги натера да се повлечат кон Бит-пазар. Дел од нив продолжија со инцидентите, па дури и искршија излог гаѓајќи го со стаклени шишња и камења.
