Македонската економија забележа исклучително висок раст на бруто-домашниот производ (БДП) од 4,3% во второто тромесечје, соопшти премиерот Христијан Мицкоски, оценувајќи дека овие силни бројки се јасен доказ дека земјата конечно тргна напред.
„Во второто тромесечје имаме исклучително висока економска активност и зголемен бруто домашен производ од 4,3%. Тоа е уште една лоша вест за опозицијата, која претпоставувам дека сега повторно жали и тагува што Македонија оди напред, а не е вовлечена во нивното политичко мочуриште на лаги, клевети и измислици“, истакна премиерот.
Мицкоски подвлече дека Владата интензивно работи на надминување на напластените децениски проблеми, а ефектите од досегашните мерки веќе стануваат видливи за граѓаните.
„Македонија ќе продолжи да оди напред. Не можам да кажам дека сите проблеми се решени, бидејќи многу се наследени, но она што е важно е дека работиме и дека се трудиме сето она што е наследено да го решаваме и да не создаваме нови. Резултатите конечно излегуваат на површина“, заклучи премиерот.
© Vecer.mk, правата за текстот се на редакцијата
