Во последните шест месеци се регистрирани три случаи на листериоза, поради што Институтот за јавно здравје испрати препорака до граѓаните внимателно да ја избираат храната што ја консумираат, како и инспекциските служби редовно и темелно да ја проверуваат храната што се пласира на пазарот. Доктор Драган Кочински објаснува дека особено во лето, но и во текот на целата година, е неопходна поголема лична хигиена и контрола на прехранбените производи.
Експертите предупредуваат дека речиси секој тип храна може да биде ризичен. Чести носители се месо и месни производи, млеко и млечни производи, свежо овошје, зеленчук и риба. За да се намали опасноста, граѓаните треба да избираат пастеризирано млеко и добро проверена храна, исто како што се преземаат мерки и за други цревни заболувања.
Директорката на Институтот за јавно здравје, Марија Андоновска, потенцира дека се бележи значително намалување на бројот на анализирани мостри на храна во лабораториите на Институтот – од 3.640 во 2014 година, на само 357 во 2023 година. Ова го отвора прашањето за стандардите и континуитетот во безбедносната проверка на храната што стигнува до потрошувачите.
Од Агенцијата за храна и ветеринарство потврдуваат дека сите испитувања се вршат со користење на акредитирани методи, со акцент на државните лаборатории како Факултетот за ветеринарна медицина и центрите за јавно здравје. Официјалните контроли дозволуваат инспекторите самите да одлучат во која акредитирана лабораторија ќе ги испратат мострите. Бошко Стојкоски од секторот за инспекциски надзор посочува дека во повеќето случаи примероците завршуваат токму во државните лаборатории.
Исто така, лабораториите имаат можност да учествуваат на јавни набавки и преку најниска понудена цена да добијат право на тестирање според годишните мониторинг планови. Останува апелот за поодговорно постапување од сите субјекти вклучени во синџирот на безбедност на храна.
© Vecer.mk, правата за текстот се на редакцијата
