Со особена радост и задоволство со празнувањето на најголемиот христијански празник Христовото Воскресение – Велигден, темелот на христијанството во светот повеќе од две илјади години, дозволете ми Вам лично, на членовите на Светиот Синод, на верниците на нашата древна Македонска православна црква и на нашиот македонски народ, од името на членовите на Социјалистичкта партија на Македонија и од мое лично име да Ви го честитам Велигден и да Ви посакам здравје, благодет, Христова љубов, а на сите граѓани спокој во секој дом и во сечие срце.
Овој велик ден е возвишен зошто е празник во кој торжествува животната радост и од кој што извираат љубовта и надежта. Ден кој ја роди и ја раѓа богоугодната радост.За да го доживееме и ние воскресението Христово, потребно ни е да се утврдуваме во вистината и правдата, да растеме во љубовта и благочестието, во трпението и милосрдието – да живееме во верата со добри дела. Само доколку нашиот живот го красат такви добродетели тогаш сме ја разбрале смислата на нашето постоење.
Овој голем христијански празник е можност да ја истакнам длабоката увереност дека нашата Македонска православна црква и понатаму ќе продолжи со ширењето и јакнењето на верата, душата на нашиот богоугоден македонски народ, во јакнењето на националното, меѓунационалното и мулти-конфесионално разбирање, како и во зачувувањето и развивањето на нашиот културен и национален идентитет, зошто само така обединети и сплотени можеме заедно нашата Татковина да ја направиме поубава за сегашните и идни генерации.
Прославувајќи го Христовото воскресение ја славиме безусловната љубов и мирот меѓу сите луѓе насекаде низ светот, толку потребни во денешниве времиња. Затоа да бидеме благодарни на Неговата милосрдност и бескрајна љубов.
Честит да ни е Великиот ден – Воскресение Христово, Господ ни дари сила, верба и благослов, за да го сочуваме, негуваме она што ни го дал како наследство, чувајќи го грижливо, одговорно, праведно и чесно.
Нека е за многу години големиот празник Велигден! Христос Воскресна!
СПМ
© Vecer.mk, правата за текстот се на редакцијата
