Членот на Централниот комитет на ВМРО-ДПМНЕ, Валентин Манасиевски, на денешната прес-конференција изнесе тврдења за наводна средба во Скопје меѓу српски опозициски претставници и функционери на СДСМ.
Според Манасиевски, на средбата учествувале Бранко Ружиќ, Јован Ратковиќ и генералниот секретар на СДСМ, Александар Саша Димитријевиќ. Тој посочи дека, според нивните информации, на состанокот се разговарало за формирање на опозициски фронт во Србија.
Манасиевски тврдеше дека за средбата досега нема демант од страна на Димитријевиќ.
Во изјавата беше споменато и името на Ратковиќ, за кого беше наведено дека е меѓународен секретар и член на претседателството на Социјалдемократската партија во Србија, како и еден од основачите на движењето „Отпор!“.
Дополнително, од ВМРО-ДПМНЕ обвинија дека зад овие активности стојат насоки од Зоран Заев и Зоран Башановиќ.
Од партијата исто така упатија критики кон раководството на СДСМ, наведувајќи дека партијата, според нив, дејствува во интерес на политички структури надвор од државата.
© Vecer.mk, правата за текстот се на редакцијата
