За почесниот конзулат на Унгарија, таа титула ја стекнав на крај на 2020 година со одлука за согласност од оваа влада и со одлука за отворање на конзулатот повторно од оваа влада предводена од СДСМ и тоа се факти објавени во Службен весник, изјави кандидатката за градоначалник на Скопје, Данела Арсовска за „Жешко политичко лето“ на Канал 5, во однос на нападите и манипулациите од СДСМ дека таа била нечиј човек.
Арсовска вели дека како претседателка на Сојуз на стопански комори во изминатите 10 години соработувала и со владата на ВМРО-ДПМНЕ и со владата на СДСМ и тоа не ја прави ничиј човек и посочи дека таа е човек само на скопјани.
- Досега не сум била член на политичка партија и тоа се факти. Ја објавив својата кандидатура како независен кандидат кој претендира да биде градоначалник на Скопје и поддршката ја добив и од скопјани и од моите пријатели, а исто така понатаму поддршка за поубаво Скопје добив и од ВМРО-ДПМНЕ и им благодарам за тоа. Јас ги повикам и се надевам на поддршката од Алијансата за Албанците, Алтернатива и сите останати политички и општествени чинители и најважно од се верувам дека ќе ја добијам поддршката од скопјани се надевам и од симпатизерите на СДСМ, изјави Арсовска.
Арсовска истакна дека и покрај тоа што од првиот ден власта се служи со навреди, напади лаги и манипулации кон неа, таа нема да обрнува внимание на тоа и нејзината кампања ќе биде позитивна фокусирана на решенија за граѓаните, додека за нејзиниот против кандидат Шилегов изјави дека нему одговорот ќе му го испорачаат скопјани на 17 октомври.
© Vecer.mk, правата за текстот се на редакцијата
