Министерот за правда има слаби перформанси, порача вечерва пратеникот на ВМРО-ДПМНЕ, Антонио Милошоски вечерва во емисијата Топ тема на телевизија Телма коментирајќи ја работата на министерот за правда и дел од владината коалиција ЗНАМ, Игор Филков.
Тој додаде дека очекувал од Министерството за правда до сега да бидат изработени законски измени на одредени системски закони, меѓу кои и Предлог Закон за Јавно обвинителство, нов Кривичен законик, Предлог Закон за плати на судиите, но до ден денес истите ги нема.
„Ова е мој личен став. Јас сметам дека министерот за правда има слаби перформанси по однос на обврските кои што ги има преземено за реформите во правосудството“, кажа Милошоски.
Пратеникот додаде дека во област и ресорот правда „има навистина слаб придонес од страна на Филков”.
Критиката на Милошоски кон Филков доаѓа еден ден откако министерот за здравство и лидер на Алијанса за Албанците, дел од владината коалиција „Вреди“, Арбен Таравари, во интервју за „360 степени“ изјави дека од 100 километри се гледа неусогласеноста на „Вреди“ во владината коалиција.
Тој исто така рече дека има контакти со ДУИ и дека такви контакти имале и лидерите на другите партии од „Вреди“.
Тие денеска ги демантираа наводите на Таравари.
© Vecer.mk, правата за текстот се на редакцијата
