Едно од најмодерните и најубаво уредените детски катчиња во Скопје, игралиштето „Патрик“ зад ТЦ „Три Бисери“ во Аеродром, преку ноќ се претвори во урнатини и е привремено затворено за дечињата. Несовесни насилници брутално ги искршиле реквизитите и инвентарот, оставајќи зад себе пустош и финансиска штета која според првичните проценки изнесува повеќе илјади евра.
Случајот експлодираше во јавноста откако познатиот јутубер Никола Поповиќ објави видео на кое снири група деца затекнати на самото место и директно ги прашува дали тие го оштетувале и кршеле инвентарот, на што едно од нив негира дека сторило нешто лошо. Сепак, по итниот увид на терен, градоначалникот на Општина Аеродром, Дејан Митески, потврди дека се работи за сериозен и недозволив вандализам кој веднаш е пријавен во полиција, а против сторителите веќе се поднесени соодветни кривични пријави.
Митески преку Фејсбук порача дека Општината итно ќе започне со целосна санација и замена на оштетените реквизити со нови, но упати и алармантен апел до јавноста, нагласувајќи дека вакви грозни сцени се случуваат низ многу други општини. Тој побара итна општествена одговорност и ги повика граѓаните без размислување да го пријават во полиција секој оној кој го уништува заедничкиот простор на нашите деца.
© Vecer.mk, правата за текстот се на редакцијата
