Поранешниот директор на Бирото за јавна безбедност (БЈБ), Митко Чавков, кој беше осуден за настаните во Собранието од 2017 година, бара фер и законита постапка преку која јасно ќе се утврди присуството или отсуството на одговорност кај сите инволвирани страни. Според него, досегашната слика за овој настан е нецелосна и под силно влијание на тогашната политичка агенда за промена на името, поради што е неопходна проверка на работата на институциите кои го водеа процесот.
„Да подвлечам уште еднаш, ако има одговорност, таа треба да се утврди во законита, фер и непристрасна постапка. Ако нема одговорност тоа исто така треба јасно да се утврди. Најлош исход за едно општество е кога големи историски настани остануваат покриени со политички наративи и недоверба во институциите. Затоа сметам дека „зад завесите“ останаа многу прашања. А, тие прашања не се важни само за минатото, туку и за иднината на Македонија“, рече Чавков.
Во своето интервју, дадено за МИА, Чавков смета дека многу суштински прашања се намерно премолчени и дека општеството не смее да дозволи вистината за вакви значајни моменти да биде заменета со политички наративи кои ја поткопуваат довербата во правниот систем.
„Ќе бидам директен: според моето длабоко уверување, процесот за 27 април беше политички контаминиран уште од самиот почеток, тоа го темелам на конкретни факти и околности“, рече Чавков.
© Vecer.mk, правата за текстот се на редакцијата
