На денешното судско рочиште за случајот со двојното убиство на Вања Ѓорчевска и Панче Жежовски, Александар Ѓорчевски, таткото на убиената Вања, во својот завршен збор, побара конечно откривање на мотивот за смртта на неговата ќерка. Тој директно се обрати кон првообвинетиот Љупчо Палевски, инсистирајќи да ја каже целата вистина.
Ѓорчевски изјави дека од самиот почеток на судењето се надева дека ќе ги чуе сите одговори. „Во текот на целиот процес внимателно слушав и секогаш очекував да биде разјаснето зошто беше убиена Вања. Некои од обвинетите посочија токму кон Палевски како личност која ги знае сите детали. Поради тоа го замолувам и очекувам да ја соопшти вистината“, рече Ѓорчевски.
Во текот на денешното рочиште, освен таткото на Вања, своите завршни зборови ги дадоа и бранителот на Палевски, како и останатите обвинети во предметот.
© Vecer.mk, правата за текстот се на редакцијата
