Општините ширум Западен Балкан веќе можат да аплицираат за иницијативата WiFi4WB (WiFi за Западен Балкан), која ќе обезбеди бесплатни Wi-Fi точки за најмногу 500 општини во регионот, во кој е и Македонија.
Како што е наведено на веб-страницата на Европската комисија, Wi-Fi интернет ќе биде инсталиран на јавни места, како што се плоштади, паркови, библиотеки, музеи и училишта, обезбедувајќи им на жителите и посетителите бесплатен и сигурен пристап до интернет.
Општините кои учествуваат во програмата ќе добијат сеопфатна поддршка, вклучително снабдување и инсталирање на опрема за Wi-Fi, интернет услуга и одржување.
Тие, пак, се обврзани да се заложат за одржување на услугата по почетниот период на финансирање, за да обезбедат долгорочна одржливост и влијание.
Јавниот повик е отворен за сите општини, секако и за Македонија, а пријави може да поднесат градоначалникот или претседателот на општината, функционер вработен во општината или член на општинскиот совет.
Крајниот рок за аплицирање е 28 април 2025 година. Иницијативата WiFi4WB е дел од Планот за раст на ЕУ за Западен Балкан, кој ја нагласува дигиталната трансформација како клучен двигател на регионалната интеграција.
Програмата има за цел да го намали дигиталниот јаз, да ги зголеми економските можности и да ги зајакне локалните заедници преку обезбедување универзален пристап до интернет.
WiFi4WB е дел од акцијата EU4Digital, финансирана од ЕУ и германското федерално министерство за економска соработка и развој, а имплементирана од Германското друштво за меѓународна соработка.
© Vecer.mk, правата за текстот се на редакцијата
