Министерството за животна средина и просторно планирање денеска најави пакет засилени мерки со кои ќе се зајакне контролата врз индустриското загадување и ќе се подобри управувањето со природните ресурси. Централно место во најавите доби воспоставувањето на регистарот на загадувачи, нов систем кој ќе собира сигурни и споредливи податоци за емисиите, потрошувачката на енергија, вода и суровини, како и за преносот на отпад – инструмент што, според Министерството, ќе биде клучен за транспарентност и за зголемена одговорност на сите носители на А‑интегрирани еколошки дозволи.
Како што информира министерот за животна средина и просторно планирање, Мухамед Хоџа, новиот закон за индустриски емисии ќе стапи во сила во септември 2027 година. Во периодот што следува Министерството ќе организира средба со сите оператори што поседуваат А-интегрирана дозвола, со цел навремено информирање и подготовка за новите обврски. Тој најави и јавна расправа за новата дозвола на „ТИТАН Усје“, како и засилување на контролните механизми.
– Државната лабораторија се екипира. Надмината е пречката за нови вработувања, ангажиран е човек, се очекува уште еден да биде ангажиран – рече министерот.
Регистарот на загадувачи ќе биде тема на состанок со индустриските оператори во април. Тој ќе содржи податоци за емисии на загадувачи, пренос на отпад, потрошувачка на енергија, вода и суровини и ќе овозможи споредливи и сигурни информации. Регистарот ќе опфаќа мерења што ќе ги проследуваат самите индустрии.
Хоџа посочи дека институциите работат и на мерките за намалување на загадувањето од греењето. Во 21 јавен објект веќе е сменет системот за греење како дел од поширок процес, кој треба да опфати 70-ина објекти. Активна и мерката за субвенционирање инвертер-клими, со која 4.700 домаќинства ќе добијат уреди со повисока енергетска ефикасност.
Министерот најави расправа за Белчишко Блато за заштитено подрачје и јавна расправа на закон за природа, кој ќе биде објавен на ЕНЕР. Во владина процедура набргу ќе влезат законите за Студенчишко Блато и за Охридското Езеро.
Регионалните центри за отпад работат според предвидената динамика, паралелно се спремаат тендери за нови регионални центри.
– Првин ќе почнеме со Новаци и со Русино, во тек е постапката за Свети Николе – рече министерот.
Во врска со колекторскиот систем за Скопје, чија претходна ИПА 2-постапка беше раскината поради неквалитетна изведба, сега продолжува со национално финансирање. Во тек е тендерската постапка за довршување на преостанатите 900 метри, а пречистителната станица е во изградба и треба да биде завршена до 2029 година.
– По пуштањето во употреба, цената за водата може благо да се зголеми бидејќи трошокот за третман на отпадни води ќе се пресметува преку фактурите од „Водовод“, во надлежност на локалната власт – информираа на брифингот.
За малата депонија во ОХИС е формиран интер-партнерски фонд за чистење. До сега се исчистени три од пет базени, а процените се дека има до 1.000 тони отпад со хексахлороциклохексан (HCH) и дополнително загадена почва.
– Договорот за дополнителни средства е веќе потпишан, а тендерската документација е во изработка. Владата има заклучок да обезбеди средства за наредните три години – посочија тие.
Националниот парк Маврово, по повеќе од 40 години, се подготвува да биде репрогласен за национален парк. Постапката е пред јавна расправа, студијата е готова, а дополнително се анализира сегментот на строга заштита.
Директорката на Државниот инспекторат за животна средина, Ивана Гиновска, на брифингот информира дека биле спроведени 366 надзори, издадени 108 решенија и иницирани казни од над 450.000 евра.
Во март е направен и вонреден надзор во „Усје“, каде е мерено присуство тешки метали. Резултатите се очекуваат во наредните денови.
© Vecer.mk, правата за текстот се на редакцијата
