Бегството на Артан Груби е очајнички обид и признавање на вина за случувањата во Државна лотарија, вели вицепремиерот Александар Николоски.

Тој вечерва во гостување посочи дека прв го објавил скандалот со Лотарија и дека прашање на време е кога Интерпол ќе го испорача Груби на органите на прогонот.

„Бројни обиди правеше Артан Груби да го промени Законот за игри на среќа, мислејќи дека на тој начин ќе си го амнестира криминалот и не успеа заради нашиот отпор. Лотарија беше перална на пари, дувло на криминал на СДСМ и ДУИ. Братски го правеа тоа, фронтмен беше поранешниот шеф на кабинет и после тоа директор на Лотарија. Но, убеден сум дека меѓународната потерница ќе вроди со плод и прашање на недели ќе биде само кога ќе го видиме на граница како Интеропол ќе ги донесе. И верувам дека не само за овој случај, туку и за други случаи ќе одговараат“, истакна вицепремиерот Николоски.

Според него, јасно било зошто ДУИ ги пролонгирал барањата за предвремени избори од причина за да ја средат работата во Лотарија, надевајќи се дека нема да одговараат.

„Политички договор нема со ДУИ. Морален хазард е СДСМ да обвинува за ДУИ затоа што до последен ден тие остануваа со ДУИ. Тие премиер дадоа Албанец само да бидат во влада. Тие пола држава дадоа на ДУИ, само за да бидат во влада, тие бланко гласаа сè во Собранието и кои го амнестираа криминалот на ДУИ. СДСМ ќе има морален кредибилитет да критикува само кога ќе се реформира и кога ќе се извини за тоа што го правеа“, нагласи Николоски. 

Меѓу една од многуте теми на кои зборуваше вечерва потпретседателот на ВМРО-ДПМНЕ, Александар Николоски беше и РЕК Битола, криминалите во Тец Осломеј и скандалите кои се случуваа во време на власта на СДСМ и ДУИ.

Николоски најпрво се осврна за Васко Ковачевски, а за него вели дека ќе мора да се врати назад.

“И тој како Груби нема каде да бега. Не е Асад да добие политички азил“, започна Николоски.

Потоа потсети на криминалите кои токму тој ги обедини додека ВМРО-ДПМНЕ беше во опозиција.

“За РЕК Битола очекувам и други случаи да се отвораат. Јас јавно сум зборувал за овој случај и други случаи кои очекувам да се отвараат. Овој случај со адитивите не е единствен, станува збор за класична злоупотреба. Јас бев тој кој во кампањата ги извади куќите во Неготино на еден од осмничените и неговото семејство. Очекувам во иднина да се отвораат и други случаи кои ВМРО-ДПМНЕ ги презентираше во опозиција. Како тоа една компанија добиваше тендери за ископ, па потоа добиваше уште еден идентичен тендер буквално јајце на јајце беа тендерите. Па како исти анкеси добиваше во двата тендери. Како една компанија, само тоа добиваше на електронска аукција? Како никој друг не се пријавуваше?“, прашува Николоски и ги наведува овие нелогичности.

Николоски вели дека сега на потег се органите на прогонот.

“Видовме од новото раководство на ЕЛЕМ, со претходната власт производствената цена на електрична енергија скоро и да се дуплираше. Треба од Буџетот да се плаќаат субвенции за тоа граѓаните да не го почувствуваат, но за жал го чувствува стопанството. Овие случаи треба да ги разгледаат обвинителството, финансиската полиција, органите на прогонот. Парите мора да се вратат назад. Ние останува посветени на овој. Кај граѓаните имаше коментари „дали ќе се испорача правдата“, секако дека правдата ќе биде испорачана. Очекувам сега судството да го одговори соодветно. Целиот фокус на јавноста е таму, да бидат на висина на задачата“, заклучува Александар Николоски.

“Ковачевски како Груби нема каде да бега. Не е Асад да добие политички азил. Прашање на време е кога ИНТЕРПОЛ ЌЕ ГИ ИСПОРАЧА СИТЕ“