Градоначалник на град Скопје Орце Ѓорѓиевски објави дека од денес е започната широка и сеопфатна акција за реконструкција на пешачките патеки во Скопје, со цел побезбеден, поуреден и помодерен јавен простор за сите граѓани.
Активностите стартуваа на булеварот „Партизански одреди“, на потегот од мостот „Обединети нации“ до пешачкиот мост „Влае“, во површина од 1200 метри квадратни. Оваа делница добива целосно нов лик – пешачка патека со ширина од 4 метри, комплетно реконструирана и современо уредена, со нова подлога, подобрена пристапност, уредени рабници и зголемена безбедност за сите учесници во сообраќајот, потенцира Ѓорѓиевски во објавата.
Градоначалникот нагласи дека токму оваа патека била една од најбараните од граѓаните, имајќи предвид дека станува збор за исклучително фреквентна зона која со години е во сериозно лоша состојба.
Со оваа интервенција, конечно ставаме крај на сликите на запуштеност и небезбедност. Ваквите слики стануваат минато, додаде првиот човек на Град Скопје.
Ѓорѓиевски додаде дека продолжува со интензивна реконструкција на пешачките патеки и велосипедската инфраструктура, но и со изградба на нови современи решенија, затоа што скопјани заслужуваат функционален, уреден и европски град, што ги става луѓето и нивното секојдневие на прво место.
© Vecer.mk, правата за текстот се на редакцијата
