Министерот за култура и туризам, Зоран Љутков, во интервју за МИА зборува за културата како најсилниот национален ресурс и како темел врз кој треба да се гради иднината на туризмот и имиџот на државата. Тој вели дека нашето културно наследство е богатство што не може да се купи, копира или измисли, и токму затоа претставува најсилниот капитал на Македонија. Според него, во културата се вградени историјата, духовноста, традицијата и современото создавање – елементи кои ја прават земјата уникатна и препознатлива.
Љутков истакна дека визијата на Министерството е Македонија да се позиционира како дестинација каде што културното наследство не е само споменик на минатото, туку активен двигател на туризмот. Тој објасни дека секој посетител треба да има можност да ја доживее земјата преку интеракција со локалните приказни, занаети, музеи, археолошки локалитети и гастрономски искуства.
Во однос на туристичкиот модел, министерот рече дека клучната цел е посетителите да се задржуваат најмалку два до три дена, наместо само неколку часа. Како пример, тој ја посочи потребата од интегрирани програми – тури што комбинираат култура, храна, природа и современи содржини, поддржани со дигитални алатки што ќе му помагаат на туристот да се снајде низ земјата.
Љутков нагласи дека „вистинскиот раст“ се случува кога туристот останува подолго, троши локално и станува дел од економскиот и културниот живот на заедницата. Тоа, според него, ќе го засилат новите 48- и 72-часовни туристички пакети, кои нудат широк спектар автентични доживувања – од посети на винарии, до археолошки тури и гастрономски работилници.
Посебно се осврна и на улогата на гастрономијата во новиот концепт. Тој истакна дека храната не е само вкус, туку продолжение на културната приказна на Македонија. „Гастрономијата ја збогатува приказната, но никогаш не ја заменува“, рече министерот, додавајќи дека концептот „култура со вкус“ треба да стане дел од националниот бренд. Планирани се гастрономски тури поврзани со културните локалитети – антички инспирирани јадења во Стоби, рударска традиција во Кратово, езерски специјалитети во Охрид.
Љутков зборуваше и за големиот неискористен потенцијал на коридорот Е75, кој го нарече „културно-туристички коридор“. Тој објасни дека секојдневно низ Македонија транзитираат милиони патници кои можат да се задржат – ако им се понуди видлив, јасно означен и организиран сет на културни и гастрономски атракции покрај автопатот. Проектот „Stop and Discover“, како што рече, има цел да задржи дел од патниците на барем едно ноќевање, што ќе значи директен економски бенефит.
Во делот за стратегиската поврзаност, министерот истакна дека клучот е во изградба на национална туристичка мрежа која ќе ги обедини институциите, општините и приватниот сектор преку единствен дигитален систем. Тоа, според него, ќе создаде чувство на интегрирана држава со јасна и прецизна комуникација кон туристите.
Говорејќи за 2028 година, Љутков ја изнесе својата лична визија: Македонија да стане земја што луѓето ја чувствуваат и ја паметат, земја што нуди искуство кое остава трага. Тој рече дека сака Македонија да биде дестинација со карактер, автентични приказни, силен културен идентитет и современа презентација на историјата. Вели дека сака државата да стане европска туристичка точка со квалитетен, гостопримлив и професионален систем.
Сакам Македонија да биде место кое ги почитува своите корени, но гради модерна приказна. Место кое туристите не го забораваат, додаде тој.
© Vecer.mk, правата за текстот се на редакцијата
