Зорица Чавкова Пинтарич, ќерката на поранешниот директор на Бирото за јавна безбедност и министер за внатрешни работи Митко Чавков, кој вчера излезе од затворот во Штип каде ја издржуваше казната за настаните од 27 април, во изјава за „Скопје1“ посочува дека нивната борба тек почнува. Таа посочува дека не може да го опише чувството кога го пречекала на слобода.
-Татко ми беше неправедно осуден и години помина во затвор. Од дете растев со семејни посети на секои две недели, а подоцна, кога го положив правосудниот испит и добив лиценца за адвокат, кај него влегував не само како ќерка, туку и како адвокат… кој смееше да застане помеѓу татко и ќерка?
Секој ден го посетував. Денеска го пречекав на слобода. Тоа е чувство што не може да се опише со зборови. На излезот им се заблагодарив на затворските службеници за човечноста што ја покажуваа низ годините… ги паметам гестовите на сочуство и поддршка од секој еден. Народот беше на наша страна безрезервно, безброј пораки во знак на поддршка добивавме низ годините наназад, напиша таа.
Таа додава дека е горда на својот татко, посочувајќи го како човек од кого учела не само право, туку и достоинство.
-Јас сум многу горда на татко ми… тој е магистар по кривично право, со часови поминуваме заедно анализирајќи случаеви, разработувајќи правни институти. Од татко ми учев за правото, но најважно .. научив за достоинство и за тоа како човек да остане исправен и кога му е нанесена најголема неправда. Имам прекрасна и голема фамилија и тоа е моето најголемо богатство. Токму семејството беше силата што не одржа низ сите овие години.
Денес е на условен отпуст согласно судска одлука, поради причини поврзани со личноста и здравствената состојба. Беше осуден на казна затвор 16 години, заклучно до 12.05.2036 година. Пред нас се нови планови и заедничка мисија да бидеме поддршка и глас на луѓето во затворските установи и да продолжиме да се бориме за правда. Тоа го правиме веќе активно, стои во објавата.
Во завршницата, Чавкова испраќа директна порака до, како што вели, „креаторите на прогонот“.
-Сега ми е важно да искористам прилика да порачам до креаторите на прогонот, дека нема да се откажеме од борбата за вистината. Барањето за повторување на постапката беше експресно одбиено од Кривичниот суд, а потоа таа одлука беше потврдена и од Апелациониот суд. Но денес, семејствата на осудените за 27 април и самите обвинети се посплотени и посилни од кога било. Нема да дозволиме оваа неправда да биде заборавена.
Сите што учествувале во политичкиот прогон еден ден ќе мора да се соочат со законот. Да не мислат дека мирно ќе спијат уште долго, знаеме се… како изнудувале изјави, како инструирале лажни сведочења… располагаме и со материјални докази за се. Борбата тек почнува, напиша таа.
© Vecer.mk, правата за текстот се на редакцијата
