Полицијата во Тексас пронашла три напуштени деца во неделата во стан во кој имало и скелет на дете.
Страшна глетка е затекната во стан во предградие на Хјустон, а во станот имало деца на возраст од седум, 10 и 15 години. Според Sky News, најстарото момче изјавило дека скелетот е неговиот брат кој имал девет години и дека починал пред една година.
Наводно изјавил и дека неговите родители не биле со нив неколку месеци, пренесува Sky News.
Шерифот Ед Гонзалес изјави дека сцената во станот му го скршила срцето и дека децата живееле во ужасни услови. Полицијата извести дека останките што ги пронашле во станот одговараат на возраста на детето од сведочењето на 15-годишникот.
Sheriff Ed Gonzalez updating media at 3535 Green Crest. Three juveniles were found alone in a home, along with a deceased juvenile. Homicide investigators long with CPS and Child Abuse investigators are on scene. #HouNews pic.twitter.com/SpJXHbBswy
— HCSOTexas (@HCSOTexas) October 25, 2021
Полицијата во меѓувреме ги пронашла мајката на децата и нејзиното момче и ги испитува за можно убиство.
Како што пренесува NBC, децата биле пронајдени при преглед од центарот за социјална заштита, а шерифот Гонзалес рекол дека тие биле во станот веројатно месеци, а можеби и една година.
„Не бев информиран дека се затворени, но на таа возраст изгледа дека се бореле секој за себе“, рече тој. Тој вели и дека биле неухранети и имале траги од повреди. Децата се пренесени на лекување во болница.