За време на високите температури, кога асфалтот надвор се топи, многу е важно да знаете неколку важни работи.
Најважна работа што треба да ја знаеме среде лето е секако давањето прва помош на лице со сончаница или топлотен удар. Лекарите нагласуваат дека на жештините најважни се две работи, да не паничите и веднаш да се јавите во брза помош доколку температурата на телото на пациентот се искачи над 40 °С!
На почетокот, многу е важно да се знае кои се симптомите на сончаница, а кои на топлотен удар.
Сончаница
Сончаница настанува при директно изложување, пред сè на главата и вратот, на сончевите зраци. Започнува со силна главоболка и зголемување на телесната температура. Честопати се јавува замор и омалаксаност, поспаност и вртоглавица, зуење во ушите или краткотрајно губење на слухот, а кај постари лица често може да дојде до губење на свеста.
За да спречите сончаница, најважно е да избегнувате долго изложување на сонце и да ја покриете главата со соодветна капа, качкет, шапка во светли бои. По можност, главата и вратот треба повремено да се ладат со мокрење.
Прва помош при сончаница
Веднаш тргнете го лицето од сонце (во климатизирана или затемнета и добро проветрена просторија).
Истуширајте го со млака вода (или барем измијте го и ставете му ладни облоги на челото и вратот).
Дајте му да пие течност (чај, сок или обична вода) - не одеднаш во големи количини, туку повеќепати во мали голтки.
Одморот е неопходен, а следниот ден никако не треба да се изложува на сонце!
Доколку симптомите продолжат или се влошат, потребно е да се јавите на лекар!
Топлотен удар
Се јавува не само поради прекумерна изложеност на директна сончева светлина, туку и поради влажен и прегреан воздух - особено кај работниците во пекарница, во кујна во близина на високи печки, но и во прегреан автомобил, јавен превоз, па дури и во стан.
Топлотниот удар е состојба во која телото се прегрева за релативно краток временски период. Се јавува ненадејно, поради прекумерно зголемување на телесната температура и неможноста на телото да ја одржува температурата во нормални граници.
Симптоми на топлотен удар се телесна температура повисока од 40°C, општа слабост, топла и сува кожа без потење, забрзан пулс и дишење, пад на крвниот притисок, вртоглавица, главоболка, гадење, повраќање, а понекогаш и губење на свеста (што може да биде прв знак).
Прва помош при топлотен удар
Топлотниот удар е сериозна состојба која бара итна медицинска помош!
Доколку се сомневате на топлотен удар, веднаш јавете се во брза помош или контактирајте ја најблиската здравствена установа!
Доколку здравствените услуги не се достапни или е потребно подолго време за да се обезбеди стручна помош, неопходно е да се направи следново:
Веднаш тргнете го лицето од сонце или од прегреаната просторија и отстранете го вишокот облека.
Измијте го или истуширајте го со не многу ладна вода. Ако немате вода, изложете го лицето на струење на воздух (на пр. разладување со вентилатор).
Дајте му течности, доколку состојбата го дозволува тоа.
По закрепнувањето од топлотен удар, зголемена е осетливоста на високи температури и во текот на следните недели. Најдобро е да се избегнуваат високи температури и физичка активност додека лекарот не одобри.
Топлотна исцрпеност
Често се јавува како резултат на прекумерна физичка активност во услови на покачена надворешна температура и влажност на воздухот. Се манифестира со зголемено потење, грчеви во мускулите, главоболка, повраќање, нарушена видна острина, пад на крвниот притисок и слабост, како и губење на свеста.
Прва помош при топлотна исцрпеност
Лицето треба веднаш да се стави под сенка или во ладна, по можност затемнета просторија, а облеката треба да се отстрани.
Освежете го поливајќи го со млака вода или со ставање ладни облоги на главата и задниот дел на вратот.
Дајте му на лицето да пие разладена течност - вода или благ билен чај во мали голтки.
Со оваа состојба, задолжително е да се побара лекарска помош, поради можно влошување во состојба на топлотен удар. Се препорачува интравенски надомест на течности во здравствена установа.
© Vecer.mk, правата за текстот се на редакцијата
