Многу од овие суштества се крајбрежни видови, кои живеат на километри од нивните вообичаени живеалишта, на половина пат помеѓу бреговите на Калифорнија и Хаваи, пишува Би-Би-Си.
На 90 отсто од остатоците се пронајдени растенија и животни, вклучувајќи анемони, мали морски бубачки, мекотели и ракови. Научниците се загрижени дека пластиката може да помогне во транспортот на инвазивни видови.
Студијата испитувала пластични предмети поголеми од пет сантиметри во дијаметар, собрани од област каде што циркулирачките струи предизвикуваат акумулација на отпад во Пацификот.
Водечкиот истражувач д-р Линси Харам, која работеше во Центарот за истражување на животната средина на Смитсонијан, рече дека пластиката е поиздржлива од многу природни остатоци што може да се видат во отворен океан. – Тие создаваат потрајно живеалиште во оваа област, појасни Харам.
