79-годишна жена од Шпанија е уапсена како мозок на операцијата на криминална група која криумчарела кокаин во пратки со корали од Латинска Америка во Европа, соопшти денес шпанската полиција.
Цивилната гарда соопштила дека три члена на криминалната група работеле со увоз на корали во Шпанија од Доминиканската Република преку Португалија и дека контејнерите биле модифицирани за шверц на кокаин во тајни прегради, пренесува Ројтерс.
- Криминалната група имала јасна хиерархиска структура, а 79-годишната жена била водач, се наведува во соопштението.
Жената со уште двајца Шпанци на возраст од 26 и 60 години била уапсена во Португалија за време на операцијата која ја воделе шпанската цивилна гарда, националната полиција и португалската судска полиција.