Британската кралица Елизабета (95), која владее речиси седум децении, рече дека се чувствува премлад во нејзиното срце за да ја добие титулата „стара личност на годината“, открија нејзините соработници.
Организаторите на годишните сатирични награди, чии претходни добитници се актери добитници на Оскар, нобеловци и мајката на кралицата, која почина на 101 година во 2002 година, се обратија до кралицата за да видат дали ќе прифати таква чест, пренесува Ројтерс.
Меѓутоа, од списанието „Oldi Magazin“,објавија дека добиле „прекрасно писмо“ во кое им биле испратени најтоплите желби, но и информации дека нивната понуда е одбиена.
„Нејзиното Височество верува дека имате толку години колку што се чувствувате и, според тоа, Кралицата не верува дека ги исполнува релевантните критериуми за да може да ја прифати наградата, и се надева дека ќе најде подостоен добитник“, се вели во писмото на Том Леинг-Бејкер, помошникот на приватниот секретар на кралицата
Елизабета во овој случај постапи како нејзиниот покоен сопруг, принцот Филип, кој почина во април на 99 -годишна возраст, и кој пред една деценија и ја одби можноста да ја освои оваа награда, која се доделува веќе 29 години за придонесот на постарите генерации за јавниот живот.
Сепак, доделувањето на наградите на некој начин ќе има „кралски печат“, бидејќи Камила, сопругата на синот на Елизабета и наследник на принцот Чарлс, ќе им ги додели наградите на овогодинешните добитници.
