Пензиониран индиски пар од северната држава Утараканд го тужат својот единствен син и снаа затоа што не им дале внуци по шест години брак и бараат отштета од речиси 650.000 долари доколку не добијат внук во рок од една година.
- Сакаме внук или внука во рок од една година или компензација, бидејќи животот го поминав во школување на мојот син, изјавил за новинарите Сањев Прасад, објаснувајќи дека во 2006 година го испратил својот син на обука за пилот во САД, што го чинело 65.000 долари.
Синот се вратил во Индија во 2007 година, но останал без работа и семејството морало да го издржува повеќе од две години, пишува Индијан тајмс.
Во меѓувреме, 35-годишникот се вработил како пилот. Износ на обесштетувањето ги вклучува трошоците за раскошна венчавка во хотел со пет ѕвезди, луксузен автомобил од 80.000 долари и плаќање на меден месец на младенците во странство.
Неговите родители велат дека бракот му го договориле во 2016 година со 31-годишна девојка, со надеж дека ќе добијат „внуче“ со кое ќе може да играат во пензионерските денови.
- Најголемиот проблем е што ни треба внук во овој период од животот, но син ми и снаата не се грижат за нас. Му организиравме свадба со надеж дека еден ден ќе станеме баба и дедо. Оттогаш поминаа шест години - рекол тој и додал: - Се чувствуваме како, и покрај тоа што имаме се, всушност немаме ништо. Ние сме многу несреќни.
Судот ја прифатил тужбата, а рочиштето ќе се одржи на 17 мај во Хардивар, град во северната држава Утараканд. Адвокатот на родителите на Прасад рекол дека парот барал пари поради „психолошка суровост“.