Во текот на историјата на цивилизацијата, во неколку наврати имало правни случаи против натприродни суштества, религиозни симболи, па дури и против Бог. Да, една жена влегла во историјата како личност на која и прекипело бидејќи Севишниот ја изневерил и имала кратка порака за него: „Се гледаме на суд“.
Имено, во 1969 година се случил неверојатен судски спор против Бог, а приказната ја објави „The Indianapolis Star“. Приказната започнува со барање на адвокат кој барал отштета од Бога во износ од 100.000 долари за „небрежност и занемарување“.
Расел Танси, адвокат, кога слушнал за трагедијата што ја снашла Бети Пенроуз, откако нејзиниот дом бил погоден од гром, решил да поднесе тужба против Семоќниот во нејзино име. Во тужбата се наведува дека таа го смета Бога одговорен за „одржување и управување со универзумот, вклучително и времето во државата Аризона“. Поради ова, тој се смета за одговорен за громот што ја удри и изгоре куќата на г-ѓа Пенроуз. Во тужбата се барале 75.000 долари како компензаторна штета и 25.000 долари за казнена отштета.
Танси не бил ни малку наивен и знаел што прави затоа што стратешки ја поднел својата тужба во Сонома, Калифорнија наместо во Феникс. Зошто Сонома? Имено, во овој момент од времето кога низ земјата никнуваа контракултурни движења, Сонома беше дом на единствена хипи-комуна.
Земјата на која постоела комуната првично била во сопственост на необичен човек по име Луис Готлиб, кој верувал во мир и слободна љубов. Во моментот на божествена инспирација, Готлиб поднел акт со кој ја посветил својата плантажа од 30 хектари на Бога, пренесувајќи ја сопственоста на „вистинскиот сопственик“.
Поради ова, Канцеларијата на регистраторот на округот Сонома евидентирал дека на 6 мај 1969 година, Господарот на целото создавање станал сопственик на дел од светот што Тој го создал - поточно 30 хектари во Сонома, Калифорнија. Танси резонирал дека ако Бог може да поседува земја во Сонома, тогаш Бог може да биде тужен во Сонома.
Бидејќи Бог не се појавил на судењето за да ја брани својата чест, г-ѓа Бети Пенроуз го добила случајот.
© Vecer.mk, правата за текстот се на редакцијата
