Кога во 1935 година младата милијардерка Дорис Дјук пристигнала на Хаваите, планот бил едноставен – кратко задржување за време на медениот месец и враќање дома. Наместо тоа, наследничката на тутунската империја, тогаш позната како најбогатата жена на светот, останала на островите со месеци, се вљубила во Хаваите и започнала приказна која и денес ги интригира историчарите, бизнисмените и љубителите на луксузот.
Дорис Дјук била ќерка на американскиот индустријалец Џејмс Бјукенен Дјук, основачот на тутунската империја од која потекнало богатството проценувано на стотици милиони долари во време кога тоа претставувало речиси незамисливи пари. Веќе на 22-годишна возраст го наследила огромното богатство и станала една од најпознатите жени на својата ера. Со сопругот Џејмс „Џими“ Кромвел тргнала на големо светско патување, а последната станица од медениот месец бил Хонолулу. Она што требало да биде кратка посета, се претворило во повеќемесечен престој. Дорис била воодушевена од климата, океанот, локалната култура и опуштениот начин на живот на островите.
Клучниот момент се случил кога запознала човек кој веќе тогаш бил легенда – Дјук Каханамоку, олимписки шампион во пливање, човекот кој на светот му го претстави сурфањето и веројатно најпознатиот жител на Хаваите во тоа време. Каханамоку не бил само спортска ѕвезда. Тој бил симбол на Хаваите, амбасадор на хавајската култура и една од најомилените личности во историјата на островот.
Дорис брзо се спријателила со него и со неговото семејство, особено со неговиот брат Сем Каханамоку. Токму тие ја вовеле младата милијардерка во светот на сурфањето. Во време кога од жените од високото општество се очекувало времето да го поминуваат на приеми и балови, Дорис Дјук деновите ги поминувала на плажите на Ваикики, јавајќи на брановите со познатите „Ваикики Бич Бојс“ (Waikiki Beach Boys) – група локални инструктори и спортисти кои биле пионери на модерното сурфање. За тогашните општествени норми тоа било речиси незамисливо. Една од најбогатите жени на планетата во костим за капење на штица за сурфање претставувала глетка каква што јавноста не очекувала.
Сепак, Хаваите за Дорис не биле само минлива авантура. Толку многу се врзала за островите што набрзо одлучила таму да изгради своја резиденција. Земјиштето покрај океанот ѝ го пронашол токму Сем Каханамоку, а на него подоцна никнала познатата вила „Шангри Ла“, еден од најнеобичните приватни имоти на своето време. Вилата, чија изградба почнала во 1937 година, го споила хавајскиот амбиент со уметничките влијанија кои Дорис ги донела од патувањата низ Азија и Блискиот Исток. Денес таа се смета за едно од најзначајните културни зданија на Хаваите и своевиден споменик на нејзината фасцинација од светот надвор од американските граници.
Гледано од денешна перспектива, токму престојот на Хаваите претставувал една од пресвртните точки во животот на Дорис Дјук. Наместо да остане само наследничка на огромно богатство, таа станала колекционерка на уметнички дела, филантроп и жена која често избирала неконвенционален пат.
А сè започнало на плажите на Ваикики, каде што најбогатата жена на светот одлучила да ги замени салоните и приемите со океанските бранови и со друштвото на човекот кој ја промени историјата на сурфањето.
© Vecer.mk, правата за текстот се на редакцијата
