Кибернетичка група за изнуда во вторникот соопшти дека украла повеќе од еден терабајт податоци од фармацевтскиот гигант „Ново Нордиск“ (Novo Nordisk) и дека ја истражува можноста за продажба на дел од информациите, откако не успеала да изнуди 25 милиони долари од компанијата.
„ФулкрумСек“ (FulcrumSec), кибернетичка група за изнуда која се појави во октомври 2025 година, во долга порака објавена на својата веб-страница наведува дека повеќе од два месеци крадела податоци од компанијата „Ново Нордиск“.
Групата тврди дека податоците вклучуваат изворен код на компанијата, сопственички информации за лансирани и нелансирани лекови, податоци од клинички испитувања, како и податоци за вработени, лекари и пациенти. Покрај тоа, украдени се и информации поврзани со производствените погони на компанијата и детали за нивниот интерен модел за вештачка интелигенција. Портпаролот на „Ново Нордиск“ изјави дека компанијата сериозно го сфаќа инцидентот, дека нејзините главни платформи продолжуваат да функционираат непречено и дека се во контакт со надлежните органи.
Ројтерс (Reuters) не можеше веднаш да ја потврди автентичноста на податоците објавени од хакерската група, а од „ФулкрумСек“ веднаш не одговорија на барањето на Ројтерс за коментар.
Данската компанија го откри кибернетичкиот инцидент на 11 јуни, појаснувајќи дека станува збор за неовластен пристап до ограничен број интерни ИТ системи, кои вклучувале пристап до одредени лични податоци. „ФулкрумСек“ соопшти дека, откако „Ново Нордиск“ одбил да ги плати бараните 25 милиони долари, групата сега „истражува приватна продажба“ на дел од податоците поврзани со конкретни лекови и други интерни информации.
Томас Вилкан, шеф на истражување во компанијата за кибернетичка безбедност „Лаб-1“ (Lab-1), кој будно ја следи „ФулкрумСек“, изјави дека хакерската група „обично е прилично легитимна во поглед на своите способности и тврдења“.
Од „ФулкрумСек“ сепак наведоа дека нема да споделуваат дел од украдените податоци, вклучувајќи ги информациите за илјадници вработени и лекари, како и за околу 11.500 пациенти вклучени во клиничките испитувања. Групата соопшти дека, како дел од својата „стратегија за намалување на штетата“, ќе ги задржи и податоците поврзани со оперативната технологија и софтверот што се користи за интеракција со сензорите и машините во производствените погони на „Ново Нордиск“.
Компанијата „Ново Нордиск“ е глобално позната по своите хит-третмани против дебелина и дијабетес, пред сè по лековите „Wegovy“ и „Ozempic“.
© Vecer.mk, правата за текстот се на редакцијата
