Компанијата Apple минатата недела го прослави својот 50-ти роденден, одбележувајќи го патот од мала гаража во Сан Франциско до технолошки гигант чии производи ги користи секој трет човек на планетата. Во текот на пет децении, брендот што го основаа Стив Џобс и Стив Возниак го дефинираше модерниот живот, но патот до врвот не беше без сериозни грешки. Експертите истакнуваат дека клучот за нивниот успех бил во тоа што не продавале само хардвер, туку сон и статусен симбол.
Три икони што го променија светот на технологијата
Првиот голем пресврт го донесе iPod во 2001 година, кој преку ноќ ја направи дигиталната музика достапна за сите и го спаси Apple од банкрот. По него, во 2007 година пристигна iPhone, уред кој ги спои телефонот, интернетот и музиката во едно, а денес се продава со брзина од седум парчиња секоја секунда. Третиот голем хит е Apple Watch, кој стана најпродаваниот часовник во светот, надминувајќи ја комплетната швајцарска индустрија на часовници.
Каде Apple погреши
Не сите производи беа револуционерни, а некои беа прескапи промашувања како компјутерот Apple Lisa, кој чинеше неверојатни 10.000 долари. Во помодерните неуспеси се вбројува контроверзната „butterfly“ тастатура на лаптопите, која се расипуваше поради обична прашина, што го принуди Apple да го повлече тој дизајн.
Најновиот предизвик за компанијата се очилата Vision Pro, кои поради високата цена и гломазноста засега останаа без поширока публика и значителен пазарен успех.
© Vecer.mk, правата за текстот се на редакцијата
