Акциите на компанијата „Крокс“, позната по своите удобни папучи и сандали „Крокс“, паднаа за дури 29,2 проценти за еден ден, бидејќи компанијата предупреди за послаба продажба како резултат на американските царини, послабата потрошувачка и променливите модни трендови.
Во вториот квартал, „Крокс“ објави загуба пред оданочување од 448,6 милиони долари, во споредба со профитот од 296,4 милиони долари една година претходно.
Приходите, сепак, се зголемија за 3,4 проценти на годишно ниво, на 1,1 милијарда долари.
Компанијата предвидува дека нејзините приходи во тековниот квартал ќе се намалат за девет до 11 проценти на годишно ниво, што непријатно ги изненади аналитичарите кои очекуваа мал раст, објавува „Гардијан“.
Главниот извршен директор Ендру Рис вели дека американските потрошувачи станале „многу претпазливи“ и купуваат помалку бидејќи се грижат за сегашните и идните зголемувања на цените.
Компанијата одговори на новата ситуација со мерки за штедење, намалувајќи ги залихите и повлекувајќи ги промотивните акции со цел да ја заштити профитабилноста.
Покрај горенаведените фактори, се чини дека кроксовите едноставно излегуваат од мода. За време на пандемијата на коронавирусот, оваа „грда обувка“ стана хит поради својата удобност, а некои познати личности дури и ја носеа јавно за промоција.
Сепак, од неодамна, спортските и атлетските патики се враќаат во мода, тренд кој веројатно ќе продолжи со претстојното Светско првенство во ФИФА во 2026 година и Олимписките игри во Лос Анџелес во 2028 година.
© Vecer.mk, правата за текстот се на редакцијата
