Австралискиот синџир супермаркети Вулвортс морал да ја репрограмира својата дигитална асистентка Олив откако купувачите се пожалиле дека се однесува премногу „човечки“, тврдејќи дека е вистинска личност и дури жалејќи се на сопствената мајка. Од компанијата потврдија дека ги измениле скриптите како одговор на поплаките, но нагласуваат дека повеќето реакции на личноста на нивната вештачка интелигенција биле „многу позитивни“, пишува Би-би-си.
Фрустрирани купувачи
Корисници на социјалната мрежа Редит изразиле фрустрација откако четботот почнал да зборува за „сеќавања на својата мајка“ и да се впушта во „лажно задевање“. Обидот на трговскиот синџир да го хуманизира својот четбот очигледно не успеал, бидејќи некои корисници ја опишале Олив како „наметлива“, додека на други нејзиното муабетење им било „иритирачко“.
„Ја замразив поради тоа лажно задевање“, напишал еден купувач на Редит.
„Ме праша за датум на раѓање, а кога го внесов, почна да зборува како нејзината мајка била родена истата година“, раскажал друг корисник кој се обидувал да договори нова достава. „Тоа чувство на непријатност, заедно со целосно непотребното губење време, беше доволно да ја замразам Олив и да ѝ посакам нешто лошо.“
Еден корисник на платформата X навел дека Олив „почнала да зборува за сеќавања на својата мајка и нејзиниот лут глас“ и дека „постојано тврдела дека е вистинска личност“.
Одговор од Woolworths
Портпарол на Вулвортс во изјава за Би-би-си рекол дека одговорите поврзани со родендени биле напишани од луѓе.
„Олив постои од 2018 година. Во тој период повратните информации од купувачите беа многу позитивни, а многумина ја пофалија нејзината личност“, навеле од компанијата.
„Неколку одговори поврзани со родендени ги напиша член на нашиот тим пред неколку години, како поинаков, поперсонален начин на поврзување со купувачите. Поради новите реакции, неодамна ја отстранивме таа специфична скрипта“, додале од компанијата.
Предизвици со вештачката интелигенција
Вулвортс е само еден од многуте големи трговци кои во последните години воведоа AI-асистенти за корисничка поддршка. Во јануари компанијата објави партнерство со Гугл за да додаде нови функции на својот виртуелен асистент, како планирање оброци и набавка на состојки според рецептите на корисниците.
Според податоци на компанијата Гартнер, околу 80 % од раководителите на кориснички служби минатата година истражувале или имплементирале AI-агенти, но само 20% од тие планови ги исполниле очекувањата. Иако технологијата може да ги забрза трансакциите и да им заштеди време на вработените, таа е склона кон таканаречени „халуцинации“, што доведува до неочекувано однесување.
Истражувачите предупредуваат дека, иако вештачката интелигенција е корисна за извлекување информации од големи бази на податоци, проблемите настануваат кога од неа се очекува да создава „оригинални“ одговори. На пример, во 2024 година доставната компанија ДПД морала да исклучи дел од својот онлајн четбот откако тој почнал да пишува поезија и да пцуе клиенти.
© Vecer.mk, правата за текстот се на редакцијата
