ХЈУСТОН: Тед Робертс, тогашен 25-годишен практикант во Вселенскиот центар Џонсон на НАСА, изврши една од најневеројатните и најдрзоките кражби во историјата на американската вселенска агенција – украде осум килограми месечеви камења, и сè во име на љубовта.
Според „Дејли меил“, Робертс ѝ ветил на својата девојка дека ќе ѝ „ја донесе месечината од небото“. За разлика од повеќето романтични ветувања, тој ги одржа своите – буквално.
Со помош на неговата девојка Тифани Фаулер и колешката Шеј Сор, Робертс, користејќи службени лични карти, провалил во лабораторија на НАСА по работното време во 2002 година и украл метален сеф тежок околу 270 килограми. Внатре имало околу 8 килограми примероци од Месечевите камења собрани за време на сите мисии Аполо. Проценета вредност: 21 милион долари.
Сепак, она што следеше ги шокираше и истражителите и јавноста. Двојката, според сопствено признание, посипала месечеви камења на креветот – и воделе љубов на него.
Нивното дејствување не остана долго тајна. Тие се обидоа да ги продадат примероците преку интернет, на веб-страницата на Минералошкиот клуб во Антверпен, барајќи од 2.000 до 8.000 долари за грам. Сепак, тие беа брзо фатени.
Покрај материјалната штета, предизвикана е и непроценлива научна штета – примероците се контаминираа, а рачно напишани белешки од научник на НАСА, стари триесет години, кои се наоѓале во истиот сеф, беа уништени.
Робертс беше ослободен од затвор во 2008 година. Денес тој е теоретски физичар, филозоф на физиката и писател. Во едно интервју од 2011 година, тој рече:
„Страхопочитта што ја чувствуваме кон Месечевите карпи не лежи во тие карпи – таа ни припаѓа на сите нас. Не крадете ја Месечината. Постојат подостоинствени начини да се соочите со вашата величествена безначајност.“
Неговата приказна повторно стана вирална на социјалните мрежи, каде што еден корисник хумористично коментираше:
„Првиот човек што кажа „Ќе ти ја дадам месечината“ – и всушност го направи тоа.“
© Vecer.mk, правата за текстот се на редакцијата
