Вечната дилема на многу жени – дали вагата покажува премногу, премалку или токму колку што треба – според мислењето на експертите, има многу посложен одговор отколку што мислиме.
Идеалната телесна тежина не е статичен број што треба да остане ист од дваесеттите до шеесеттите години. Таа се менува со возраста, хормоните и природните процеси во организмот, пренесува Metropolitan.si.
За жени високи 170 сантиметри, експертите нагласуваат дека слепото бркање на тежината од средношколските денови не само што е нереално, туку може да доведе до непотребно исцрпување и штета по организмот. Телото низ децениите се прилагодува, метаболизмот се забавува, мускулната маса опаѓа, а хормоналната рамнотежа се менува.
Препорачана тежина според возраста (за висина од 170 см):
- Во дваесеттите години: помеѓу 60 и 63 килограми.
- Во триесеттите години: (кога метаболизмот малку се забавува) помеѓу 62 и 65 килограми.
- Во четириесеттите години: помеѓу 64 и 67 килограми.
- Во педесеттите години: (поради хормонални промени и загуба на мускулна маса) помеѓу 65 и 68 килограми.
- По шеесеттата година: опсегот благо се зголемува на 66 до 69 килограми.
Ова не значи дека секоја година треба да додавате по еден килограм, туку дека благата промена е целосно природен дел од стареењето. Студија објавена во списанието International Journal of Public Health нагласува дека телесните параметри и пропорции во текот на животот постепено се менуваат и дека строгоста во инсистирањето на иста тежина не е секогаш смислена.
Во четириесеттите години нивото на естроген почнува да опаѓа, што влијае на метаболизмот, губењето на калциумот и промените во распоредот на телесните масти. Неколку дополнителни килограми можат дури да имаат и заштитна улога, како за внатрешните органи, така и за коските. Прениската телесна тежина во подоцнежните години го зголемува ризикот од остеопороза, фрактури и општа слабост.
Бројот на вагата можеби и не е толку важен...
Експертите затоа советуваат, наместо опсесивно мерење на тежината, вниманието да се насочи кон обемот на половината, квалитетот на исхраната и физичката подготвеност. Замената на рафинираните шеќери со интегрални житарки и доволниот внес на протеини се клучни за зачувување на мускулната маса. Исто така, треба да се има предвид дека мускулното ткиво е погусто од масното, па личност со повеќе мускули може да има поголема тежина, а да носи помал конфекциски број.
Благите осцилации, во опсег од два до три килограми, се целосно нормални и обично не претставуваат ризик по здравјето. Клучни се енергијата, квалитетниот сон и општата состојба на организмот. Ако се чувствувате силно, имате доволно енергија за секојдневните обврски и телото не ве предупредува со замор или болки, бројот на вагата можеби и не е толку важен како што изгледа. Идеалната тежина затоа не е една магична бројка, туку променлива рамка што го следи ритамот на вашиот живот.
© Vecer.mk, правата за текстот се на редакцијата
