Првите испитувања покажаа дека станува збор за гроб и починато лице стари 1.800 години. Сепак, понатамошните истражувања ги запрепастија академските кругови.
На староримски гробишта во близина на Франкфурт, Германија, 2018 година, откриено е необично место за погребување. На поранешното римско наоѓалиште Нида, археолозите пронајдоа скелет, глинен бокал, кадилница и мал сребрен талисман поставен под долната вилица на починатиот, објавува punkufer.hr.
Микроскопските анализи открија тенка сребрена фолија скриена во талисманот, долга само 3,6 сантиметри, што особено ги заинтригира истражувачите. Потребни беа години конзерваторска работа пред експертите во Центарот за археологија Лајбниц, со помош на дигитално скенирање, да можат да го „одмотат“ свитокот и да ја откријат неговата содржина.
Создаден 3Д модел
„Користејќи компјутерска томографија (КТ) технологија, успеавме да го скенираме со екстремно висока резолуција и да создадеме 3Д модел“, рече менаџерот на центарот Иван Каландра.
Дополнителен предизвик беше дешифрирањето на содржината – свитокот содржеше 18 реда латински текст што се однесуваше на Исус Христос и Свети Тит, а некои делови цитираа пасуси од Новиот завет.
Поточно, запишан е дел од Посланието до Филипјаните:
„Во името на Исус да се поклони секое колено на небесните, земните и подземните суштества, и секој јазик да исповеда дека Исус Христос е Господ – за слава на Бога Отецот.“
Откритието датира од периодот помеѓу 230 и 270 година од н.е., а некои експерти веруваат дека тоа е најраниот доказ за христијанството северно од Алпите, како и најстарите траги од ширењето на Новиот завет на територијата на денешна Германија.
Во тоа време, исклучително е невообичаено да се најде артефакт со натпис на латински – најчесто се користеле грчки или хебрејски јазик, истакнуваат истражувачите.
Ова откритие е исто така јасен пример за тоа како библиските цитати се користеле како заштита за мртвите. Истражувачите веруваат дека талисманот се носел како духовна заштита од болести, несреќа и демонски сили
© Vecer.mk, правата за текстот се на редакцијата
