Научници од Омскиот државен технички универзитет развија биотехнологија за чистење почва контаминирана со нафта и нафтени деривати со помош на сорбент, биопрепарат и глисти.
Оваа технологија го намалува нивото на контаминација за 50 до 60 проценти за период од три до четири месеци, а до 90 проценти кога се користат глисти, пренесува ТАСС.
Методата се базира на внесување сорбент, биопрепарат и глисти во почвата и може да се применува при температура на почвата од најмалку пет степени Целзиусови и влажност на воздухот од најмалку 60 проценти.
Како сорбент се користи низински ситно мелен тресет, кој има висок капацитет за апсорпција на нафтени производи, додека биопрепаратот „Тамир“ содржи комплекс од микроорганизми.
Клучен елемент на технологијата се калифорниските глисти од видот Eisenia andrei, кои се многу отпорни на загадување со нафта и имаат силен репродуктивен капацитет.
Во описот на развојот се наведува дека глистите не само што ја растресуваат почвата, туку и ја подобруваат микробната активност, со што го забрзуваат процесот на разградување на нафтата.
Технологијата подразбира фазно внесување на сорбент и биопрепарат, по што следува додавање глисти и органско ѓубриво.
Методата е применлива на различни типови почва, вклучувајќи чернозем, глинеста и песочна почва, што значи дека може да се користи во поголемиот дел од регионите во Русија.
© Vecer.mk, правата за текстот се на редакцијата
