Парот живее со своите две деца во Саутвик, на југот на Англија, а нивното откритие било во центарот на вниманието на локалните медиуми.
„Средивме 60 отсто од градината, но не најдовме ништо. Потоа решивме да ја отстраниме бетонската плоча под бараката и ги изложивме челичните шипки. Тоа ни изгледаше сомнително, бидејќи беше премногу за обична соба“, објаснила 32-годишната жена.
Парот продолжил да копа и наишол на лимен капак, па сфатиле дека нешто необично се „крие“ во земјата, пренесува New York Post.
Кога ги ископале бетонските скали и потонатиот премин, сфатиле што имаат пред себе. Тоа било засолниште од Втората светска војна, популарно наречено „Андерсоновиот бункер“.
Подземната зграда била дизајнирана да ги заштити граѓаните во случај на бомбардирање од страна на нацистичкиот Луфтвафе.
Тие главно биле изградени на длабочина од еден метар во дворовите на семејните куќи и можеле да заштитат до шест лица од шрапнели, па дури и експлозии на бомби.
Пред и за време на војната, низ Британија биле изградени повеќе од три милиони „бункери на Андерсон“, а се верува дека денес се зачувани само петнаесет, што го прави откритието на семејството Милбурн уште повредно.
Сопствениците се воодушевени што имаат парче историја во својот двор и планираат да го зачуваат. Прво ќе ја испумпаат водата, ќе го исчистат бункерот и ќе воведат светлина.
„Дефинитивно ќе го документираме секој детал. Нашите деца се возбудени, а нивното училиште сака да патува до нашето место. Ќе имаат можност да научат нешто од историјата“, изјави Кетрин.
© Vecer.mk, правата за текстот се на редакцијата
