Експертите предупредуваат дека проектот го загрозува недопрениот карпест пејзаж и традиционалниот начин на живот на локалната заедница, објави Ифимерида.
Синај е местото каде што се верува дека Мојсеј ги примил Десетте заповеди, а се верува и дека е местото каде што Бог му зборувал на пророкот преку запалена грмушка. Синај е исто така дом на православниот манастир Света Катерина од 6 век, управуван од Грчката православна црква. Египетските власти, под притисок од Грција, ги негираа плановите за затворање на манастирот, но останува загриженоста за масовниот туристички развој во регионот - изградбата на луксузни хотели, вили и туристички пазари.
Синај е исто така дом на традиционалната бедуинска заедница Џебелија, позната како Чувари на манастирот Света Катерина. Локалната заедница веќе ги видела своите домови и екотуристички објекти урнати без надомест, а во некои случаи гробовите морале да се преместат за да се направи место за паркирање.
Странските експерти и туристичките водичи тврдат дека развојот на туризмот е наметнат на заедницата одозгора и им служи на интересите на странските инвеститори, а не на локалното население.
Грција реагира
Околу 4.000 жители на Синај ретко коментираат јавно за промените. Грција е најгласниот критичар на плановите на Египет во врска со неговата поврзаност со манастирот. Тензиите се зголемија откако египетскиот суд во мај пресуди дека манастирот Света Катерина - најстариот христијански манастир во светот кој континуирано работи - лежи на државно земјиште, додека манастирот има право само да го користи земјиштето.
Грчкиот надбискуп Иероним ја нарече одлуката „грабеж на манастирскиот имот и егзистенцијална закана за духовниот светилник на православието и хеленизмот“. Надбискупот Дамијан од манастирот ја нарече одлуката „тежок удар и срам“, во едно ретко интервју, што доведе до внатрешни поделби меѓу монасите и негова оставка.
Грчката православна патријаршија во Ерусалим потсети дека планината Синај е под јурисдикција на Црквата и дека, според традицијата, самиот Светиот пророк Мухамед издал наредба за заштита на ова свето место. Манастирот, вклучувајќи го и малиот комплекс на Фатимидската џамија, е симбол на мир меѓу христијаните и муслиманите и прибежиште на надеж за светот опустошен од конфликти.
Иако судската одлука останува контроверзна, интензивната дипломатска активност доведе до заедничка декларација од страна на Грција и Египет за зачувување на грчко-православниот идентитет и културното наследство на манастирот Света Катерина.
© Vecer.mk, правата за текстот се на редакцијата
