Многумина и понатаму веруваат дека путерот, јајцата и црвеното месо се најголемите непријатели на срцето. Меѓутоа, еден искусен кардиохирург тврди дека вистинскиот проблем веќе со години стои на полиците во супермаркетите под етикетите „fit“, „light“ и „здраво“. И она што е најлошо, повеќето луѓе го јадат тоа за појадок речиси секој ден.
Д-р Филип Овадија, кардиохирург кој има извршено повеќе од три илјади операции на отворено срце, предупреди дека ултрапреработените јаглехидрати оставаат сериозни последици врз крвните садови и срцето. Како што тврди тој, доволно му е во текот на операцијата да ја погледне состојбата на артериите на пациентот и веднаш може да претпостави каква исхрана имал со години.
Според неговите зборови, најголемиот проблем не се само благите работи и газираните сокови, туку храната што луѓето често ја сметаат за сосема безопасна. Тука спаѓаат белиот леб, печивата, житариците за појадок, грицките, инстант овесните каши, ароматизираните јогурти, овошните сокови, тестенините и голем број индустриски спакувани производи кои се рекламираат како „здрави“.
„Оваа храна создава воспаление кое го уништува срцето“
Д-р Овадија објаснува дека ваквата храна предизвикува нагли скокови на шеќерот и инсулинот во крвта, што со текот на времето доведува до хронично воспаление на организмот и создавање опасни наслаги во артериите.
„Оваа храна поттикнува инсулинска резистенција, придвижува хронично воспаление и полека го уништува вашето срце“, предупреди кардиохирургот.
Како што наведува тој, во текот на операциите најчесто гледа два вида опасни наслаги во крвните садови. Едната е мек, нестабилен плак кој може ненадејно да пукне и да предизвика моментален срцев удар. Втората е тврда, калцифицирана наслага која со години се таложи и постепено го намалува протокот на крв низ артериите, што на крајот води до сериозно оштетување на срцето.
Токму поради тоа, тој предупредува дека проблемот не е само во количината на храна, туку во она што луѓето секојдневно го внесуваат, мислејќи дека избираат „поздрава опција“.
Храната што се продава како здрава често е најголемиот проблем
Тој посебно предупреди на производите со ознаки како „интегрално“, „low fat“ (нискомаслено) или „fit“, бидејќи многу од нив содржат огромни количини рафинирани јаглехидрати и адитиви.
„Гранолите, оризовите крекери, снегулките и индустрискиот леб од цело зрно често го создаваат истиот проблем како и класичната брза храна, само под поинаков маркетинг.“
Неговиот колега, кардиохирургот д-р Џереми Лондон, исто така смета дека ултрапреработената храна сериозно го нарушува здравјето на срцето и им советува на луѓето да избегнуваат производи преполни со адитиви и вештачки состојки.
„Не јадете ништо што вашата баба не би го чувала во кујната“, е едно од неговите правила.
© Vecer.mk, правата за текстот се на редакцијата
