По успешното патување околу Месечината, четиричлениот екипаж на вселенското летало „Орион“ се подготвува за последната и најкритична фаза од мисијата. Слетувањето во океанот, во близина на брегот на Сан Диего, е закажано за сабота во 2:07 часот по македонско време. Целата процедура на спуштање ќе трае околу 42 минути, започнувајќи со одвојувањето на Европскиот сервисен модул.
Влегувањето во атмосферата на Земјата се смета за најопасниот дел од „Артемис II“. Леталото ќе удри во атмосферскиот слој со застрашувачка брзина од 38.000 км/ч, што е еквивалентно на лет од Лос Анџелес до Њујорк за само шест минути. Поради триењето, „Орион“ ќе се претвори во наелектризирана огнена топка, при што топлинскиот штит ќе мора да издржи температури од неверојатни 2.760 °C – што е речиси половина од температурата на површината на Сонцето.
© Vecer.mk, правата за текстот се на редакцијата
