Она што започна пред повеќе од пет децении како искрен револт на неколкумина визионери против деструкцијата на природата, денес прерасна во најмасовното граѓанско движење во историјата на човештвото. Денот на планетата Земја го помина патот од локален протест во САД до глобален феномен кој обединува милијарда луѓе. Денес, на 22 април, светот ја рестартира својата заложба за почиста, позелена и поодржлива иднина.
Историјата на ова движење започнува во 1970 година, како одговор на сериозните еколошки штети во САД, поттикнати од катастрофалното излевање на нафта во Калифорнија една година претходно. Американскиот сенатор Гејлорд Нелсон и студентот од Харвард, Денис Хејс, го креираа овој ден со цел да ги стават „зелените“ прашања во центарот на националната политика. Она што започна како локална иницијатива, во 1990 година прерасна во меѓународен феномен кој денес претставува најголемиот граѓански настан во светот.
Денешното одбележување има јасно дефинирани приоритети: итна борба против климатските промени, драстично намалување на употребата на пластика и зачувување на биолошката разновидност. Главната порака е дека одржливоста не зависи само од големите политики, туку и од секој поединец кој преку сопствените навики придонесува за зачувување на природните ресурси.
© Vecer.mk, правата за текстот се на редакцијата
