Сите сме го почувствувале тоа – денови кога задачите едноставно „течат“ и сè завршуваме без напор, и денови кога имаме чувство дека се движиме низ магла. Нова студија од University of Toronto Scarborough нуди објаснување: клучот можеби лежи во дневните варијации на нашата ментална острина.
Истражувачкиот тим следел 184 студенти во период од 12 недели. Секојдневно биле мерени нивните когнитивни способности преку специјални задачи, а потоа учесниците известувале дали ги исполниле целите што си ги поставиле тој ден.
Резултатите покажале дека во денови кога менталната острина била на врв, учесниците завршувале работа еквивалентна на дополнителни 40 минути продуктивност. Од друга страна, „лош“ ден можел да ја намали ефикасноста за истото време, што значи дека разликата меѓу најдобриот и најслабиот ден може да достигне дури 80 минути.
Не е до карактерот, туку до денот
Истражувачите не ги споредувале студентите меѓусебно, туку ги анализирале варијациите кај секој поединец. Ова укажува дека промените во менталната острина се универзален феномен – без разлика на личноста, дисциплината или навиките.
Психологот Сендри Хачерсон објаснува дека сите имаме добри и лоши денови, а целта била да се утврди што ги разликува тие денови. Поголемата ментална острина не само што ја зголемувала веројатноста за исполнување на целите, туку доведувала и до поставување поамбициозни задачи.
Студијата се фокусирала на таканаречениот „јаз меѓу намерата и однесувањето“ – просторот меѓу она што сакаме да го направиме и она што навистина го правиме. Токму тука менталната острина игра значајна улога.
Што влијае на менталната острина?
Иако не се тврди директна причинско-последична врска, истражувањето покажува дека фактори како квалитетот на сонот, нивото на стрес, степенот на одвлекување на вниманието и мотивацијата имаат влијание врз дневните варијации.
Според авторите, постојат три клучни препораки за максимизирање на менталната јасност: доволно сон, избегнување на долгорочно прегорување и намалување на депресивните обрасци. Со други зборови, продуктивноста не е само прашање на дисциплина, туку и на грижа за менталното здравје.
Пораката е едноставна
Некои денови едноставно не се „ваши“. И тоа е во ред. Наместо постојано да се обвинуваат себеси, истражувачите советуваат да се прифати дека продуктивноста природно варира.
Идните студии би можеле да вклучат поширока популација и да испитаат дали конкретни техники за подобрување на когнитивните способности навистина водат до поголема ефикасност. Но засега, науката го потврдува она што веќе го знаеме од искуство – нашиот мозок има свои добри и лоши денови.
© Vecer.mk, правата за текстот се на редакцијата
