Германските власти известија за исклучително редок и необичен настан кој се случи во понеделникот вечерта, кога див волк касна жена среде една од најпрометните трговски улици во Хамбург.
Инцидентот се случил на улицата Гросе Бергштрасе во квартот Алтона, во непосредна близина на продавницата на „Икеа“. Според локалните извештаи, жената се обидела да го изведе дезориентираното животно надвор од фреквентната зона, по што волкот ја каснал за лицето и побегнал. Таа веднаш била пренесена во болница, но по укажаната помош е пуштена на домашно лекување.
Прв напад од ваков вид по децении
Ова се смета за прв случај на напад од волк врз човек во Германија откако овие животни почнаа повторно да се населуваат во земјата пред неколку децении.
„Ваков случај немало уште од почетокот на нивното повторно населување во 1998 година“, изјави портпаролката на Федералната агенција за заштита на природата за агенцијата „дпа“.
Драматична потера низ градот
По нападот, волкот бил забележан доцна во ноќта кај езерото Бинен алстер, во самото срце на Хамбург. Полицијата успеала да го извлече животното од водата со јаже, но акцијата траела повеќе од еден час бидејќи животното давало силен отпор, па полицајците морале да користат заштитни штитови за да го совладаат.
Матијас Хилге, портпарол на Министерството за животна средина во Хамбург (BUKEA), за Би-Би-Си изјави дека волкот веќе неколку дена бил забележуван во западниот дел на градот. Животното во моментов е на безбедно и под ветеринарна грижа, а експертите наскоро ќе одлучат за неговата понатамошна судбина.
Експертите веруваат дека се работи за млад волк кој неодамна го напуштил своето матично глутница во потрага по сопствена територија. Младите волци можат да преминат и до 70 километри во една ноќ. Се претпоставува дека дошол од соседните покраини Долна Саксонија (Niedersachsen) или Шлезвиг-Холштајн (Schleswig-Holstein), каде што популацијата на волци е во голем пораст.
Политички превирања: Заштита или отстрел?
Волците почнаа да се враќаат во Германија преку Полска по падот на Берлинскиот ѕид во 1989 година, по цели 150 години отсуство. Иако нивното враќање се смета за еколошки успех, инцидентот доаѓа во чувствителен момент. Минатата недела Горниот дом на германскиот парламент (Бундесрат) одобри мерки со кои се дозволува лов на волци со цел контрола на нивната популација и заштита на добитокот.
Федералниот министер за животна средина, Карстен Шнајдер, истакна дека волците „мора да останат“, но дека е неопходно да се најде начин за мирен соживот.
© Vecer.mk, правата за текстот се на редакцијата
