Научниците, во текот на две различни експедиции, спуштија подводни дронови на дното на океанот и таму открија недопирливо суштество од морските длабочини. Овој „жив фосил“ и животно со најбрз загриз е снимен во својата природна средина за првпат.
Гоблин-ајкулата или Mitsukurina owstoni досега беше снимана и опишувана само откако ќе беше уловена и извлечена на површината, по што брзо угинуваше, соопшти Универзитетот на Хаваи во Маноа. Новата студија, објавена во списанието Journal of Fish Biology, документира две снимки од најмистериозната и најнедопирливата ајкула на планетата – едната настаната кај подводна планина во близина на островот Џарвис, а другата на падината на Тонганскиот Ров.
Гоблин-ајкулата се нарекува „жив фосил“ бидејќи е единствениот жив претставник на своето семејство, лоза на ајкули стара речиси 125 милиони години. Двете снимки од овој вид значително го прошируваат просторот и длабочината на кои се мислеше дека живеат овие ајкули.
– Да се види најлегендарната од сите длабокоморски ајкули жива и здрава во нејзината природна средина е единствена чест. Исто така, бев многу изненаден од тоа на колкава длабочина е пронајден овој вид. Снимката од падината на Тонганскиот Ров е направена на длабочина речиси 700 метри поголема од длабочината на која се мислеше дека живее оваа ајкула – изјави Арон Џуда, докторанд во Лабораторијата за екологија на длабокоморски риби и Центарот за истражување на длабокоморски животни (DARC) при Одделот за океанографија на Факултетот за наука и технологија на океанот и Земјата при Универзитетот на Хаваи во Маноа.
Како што додава тој, ова го поместува рекордот за длабочина за целиот ред Lamniformes (несукани ајкули), кој вклучува и други значајни видови како што се белата ајкула, џиновската ајкула и мако-ајкулата. Претходно се веруваше дека гоблин-ајкулата населува само тесни подрачја долж бреговите на западниот дел на САД, Австралија и Јапонија во Тихиот Океан, како и ограничени региони во Атлантскиот и Индискиот Океан. Новите наоди затоа значително го прошируваат географскиот опсег, бидејќи двете забележувања се регистрирани во Централниот Пацифик.
Џуда во 2025 година разговарал со колегите од DARC кои споменале дека имало потенцијално забележување на гоблин-ајкула за време на експедицијата на Ocean Exploration Trust во 2019 година на бродот E/V Nautilus, која ги истражувала длабокоморските екосистеми во близина на гребенот Кингман, атолот Палмира и островот Џарвис во рамките на Националниот поморски споменик на оддалечените пацифички острови.
– Бев шокиран кога го слушнав тоа бидејќи не се знаеше дека овој вид го населува Централниот Пацифик – рече Џуда.
Снимката од тоа крстарење е направена со помош на систем од камери на возилото на далечинско управување Hercules, јавно е архивирана за глобален пристап, а подоцна ја анализирале колегите од DARC на Универзитетот на Хаваи во Маноа. Џуда ја пребарал оваа архива и открил дека тимот навистина документирал гоблин-ајкула за време на нуркањето кое се пренесувало во живо на неименувана подводна планина северозападно од островот Џарвис.
Второто набљудување е забележано за време на експедицијата во Тонганскиот Ров во 2024 година на бродот R/V Dagon во рамките на експедицијата Inkfish Open Ocean, предводена од научници од Центарот за длабокоморски истражувања Миндеру-UWA, кога камера со мамец на дното ја снимила гоблин-ајкулата во нејзиното природно живеалиште.
– Гоблин-ајкулата е едно од оние харизматични длабокоморски животни за кои никогаш не мислев дека ќе ги видиме живи. Тоа искуство беше неверојатно, а сознанието дека ја виделе и колегите од Хаваи беше едноставно неверојатно – изјави Алан Џејмисон, професор и основачки директор на Истражувачкиот центар за длабокоморски истражувања Миндеру при Океанографскиот институт на Универзитетот во Западна Австралија.
– Многу е важно да продолжиме да спроведуваме истражувања во природата – нагласи Џуда. – Новите откритија како ова покажуваат дека во нашиот длабок океан има уште многу за истражување. Со оглед на новопроширениот географски опсег на гоблин-ајкулата, овој вид сега може да се вклучи во регионалното управување и во листите за биодиверзитет на нациите, каде што претходно не ни знаевме дека е присутна!
© Vecer.mk, правата за текстот се на редакцијата
