Секако, има повеќе од еден одговор, во зависност од тоа колку сте здрави и што сакате да постигнете со вашата нова рутина, како и која од двете опции ја претпочитате.
И одењето и трчањето спаѓаат во аеробни, кардиоваскуларни вежби. Ако сакате да согорите повеќе калории или брзо да ослабете, трчањето е подобар избор. Сепак, брзото одење носи и бројни здравствени придобивки и придонесува за одржување на оптимална тежина.
Кардио вежбите, генерално, ви помагаат да ослабете или да одржувате здрава тежина, го зајакнуваат имунолошкиот систем и срцето, ги ублажуваат симптомите на хронични заболувања, го продолжуваат животниот век, ја зголемуваат енергијата и расположението и се одлични за вашето ментално здравје. Според некои истражувања, обете активности можат да ја намалат анксиозноста и депресијата, да го подобрат расположението и самодовербата.
Исто така, студиите покажаа дека само 10 минути трчање со умерена брзина го подобрило расположението на учесниците потоа. Значи, не мора да трчате со часови за да ги почувствувате придобивките.
Трчањето согорува двојно повеќе калории од брзото одење, па ако вашата цел е да ослабете, тоа е подобар избор за вас. Но, ако штотуку почнувате да вежбате или, поради некоја причина, не можете да трчате, брзото одење може да ви помогне да се вратите во форма.
Значително го подобрува нивото на аеробна кондиција, а ако држите тежина од половина килограм во секоја рака (или шише вода од половина литар), брзо ќе го подобрите мускулниот тонус. Дополнително, брзото одење со елек со тежина ќе го зголеми бројот на согорени калории. Сепак, бидете внимателни при изборот на елек, тој треба да тежи од пет до 10 проценти од вашата тежина, не повеќе од тоа.
Според истражувањата, долгото трчање често доведува до повреди, предизвикани од прекумерно извршување на оваа активност: стрес фрактури (фрактури), ITBS, т.е. синдром на триење на илиотибијалниот тракт. Се проценува дека 50 проценти од тркачите секоја година доживуваат повреда што ги спречува да продолжат со овој вид тренинг. За да го избегнете ова, не ја зголемувајте километражата пребрзо и обидете се да тренирате неколку пати неделно, ниту повеќе ниту помалку од тоа.
Ако сè уште сте неодлучни, можеби најлесно е да го пронајдете најдоброто решение за вас со мала помош од математиката: ако одите шест и пол километри за 60 минути, ќе согорите 243 калории, а ако одите еден километар повеќе за истото време, ќе изгубите 270 калории. Од друга страна, ако трчате девет километри за 30 минути, ќе согорите 270 калории, а ако трчате 10,3 километри во истиот период, ќе согорите 300 калории. Покрај тоа, можете да ги комбинирате обете техники, наизменично, со различен интензитет. И за поефикасни резултати, пробајте тренинг со темпо – зголемете ја брзината, одење или трчање, две минути, потоа забавете и вратете се на почетната брзина. Во секој случај, што и да одберете, внимателно слушајте го вашето тело кога ја извршувате активноста. Тоа ќе биде најдобриот водич за вашите понатамошни избори, ден по ден.
© Vecer.mk, правата за текстот се на редакцијата
