Истражувачите од Федералниот институт за технологија ETH Zurich создадоа микророботи со големина помала од два милиметри, способни да се движат низ крвните садови и да доставуваат лекови точно таму каде што се потребни за да се спречат мозочни удари.
Овие роботи сè уште не се тестирани на луѓе, но успешно работеле во експерименти со свињи и овци, беше објавено во списанието „Science“.
Во моментов, многу болести, како што се мозочниот удар или туморите, бараат големи дози на лекови кои се дистрибуираат низ целото тело, што го зголемува ризикот од несакани ефекти, објави Swiss info.
Новиот микроробот го решава тој проблем, благодарение на сферична гел капсула во која можат да се вградат лекови.
Капсулата е опремена со наночестички од железен оксид, кои можат да се контролираат со надворешни магнетни полиња. Кога роботот ќе ја достигне целната локација, капсулата се загрева со високофреквентно магнетно поле, што предизвикува растворање на гелот и ослободување на лекот.
„Неверојатно е колку крв се пумпа низ нашите крвни садови и со која брзина. Нашиот навигациски систем мора да биде способен да се справи со сето ова“, рече истражувачот од ETH Zurich и главен автор на студијата, Фабијан Ландерс.
© Vecer.mk, правата за текстот се на редакцијата
