Лутото нане (нане) во целиот свет е познато како зачин и чај кој се пие поради пријатниот мирис, но и поради бројните лековити својства. Лековито е целото растение, но за таа намена најмногу се користат листовите. Нането содржи висок процент на ментол, соединение кое е заслужно за неговиот освежувачки мирис и вкус.
Сите придобивки од нането
Како зачин се додава во многу јадења, десерти и освежувачки пијалаци. За лековити цели се пие како чај, а се користи и како масло, сируп, тинктура и облога. Едно од најпознатите и најизразените лековити дејства е смирувањето на органите во дигестивниот тракт. Ефикасно ги ублажува болките во стомакот и цревата, како и грчевите и мачнините, особено оние предизвикани од патување. Нането има и диуретично дејство, го поттикнува метаболизмот и го намалува апетитот, па затоа е корисно при слабеење на прекумерните килограми. Содржи витамини А и Ц, како и други активни супстанции, како што е рузмаринската киселина, кои помагаат во зајакнување на отпорноста на организмот кон воспаленија и инфекции. Се смета дека нането, токму благодарение на оваа киселина, ги ублажува алергиите и астмата, а докажано е и дека ги намалува симптомите на настинка и сува кашлица, ги неутрализира слободните радикали и го спречува создавањето на супстанции кои поттикнуваат воспаленија во организмот. Ментолот од нането е честа состојка во пастите за заби и водичките за плакнење на устата бидејќи помага во спречување на болести на непцата и јазикот и го неутрализира лошиот здив. Исто така, ја ублажува и заболекарската болка.
Чај за опуштање на мускулите
Уште едно важно дејство на лутото нане е ублажувањето на стресот. Ова исклучително лековито растение содржи големи количини триптофан, соединение од кое настанува серотонин – невротрансмитер кој го подобрува расположението. Покрај тоа, нането ги смирува главоболките и стомачните тегоби предизвикани од стрес, а чајот од нане го смирува организмот и го олеснува заспивањето. Одличен е и како средство против напрегнатост и анксиозност, бидејќи ментолот природно ги опушта мускулите, а напрегнатоста на мускулите е еден од најчестите придружни симптоми на анксиозноста. Облогите со есенцијално масло од нане можат да помогнат во ублажување на чешањето и црвенилото на кожата, но и чајот од нане може да помогне кај надразнета кожа и во лекувањето на мозолчиња и акни. Треба да се подготви благ чај од нане (доволна е една чајна лажичка суво растение на 3 децилитри вода) и да се остави да се олади до пријатна температура. Со млакиот чај се исплакнува лицето.
Масажа и инхалација против стрес
Во антистрес третманите често се користи есенцијално масло од нане. Масажата со ова масло е многу ефикасна за ублажување на типичните симптоми на стрес, како што се несоница, недостиг на концентрација, раздразливост и згрченост на мускулите. Смирувачки делува и инхалацијата со чај од нане, а покрај тоа ја подобрува концентрацијата, освежува и закрепнува, особено во состојби на зголемена психичка и физичка напрегнатост.
Лутото нане помага и во спречување на убоди од комарци. Овие досадни крвопијци не го сакаат неговиот мирис, па затоа не е лоша идеја да втриете неколку капки масло од нане на неоткриените делови од кожата.
© Vecer.mk, правата за текстот се на редакцијата
