Длабоко во срцето на австралиската сојузна држава Квинсленд се наоѓа Кулади (Cooladdi), најмалиот град во земјата кој во моментов е на продажба по неверојатно ниска цена. За само 241.531 евро, потенцијалниот купувач може да ги добие „клучевите од градот“, што вклучува локален мотел, пошта, куќа со четири спални соби и сопствен поштенски број. За споредба, оваа сума е двојно помала од просечната цена на стан во Сиднеј, која изнесува околу 564.000 евра.
Кулади некогаш бил раздвижен железнички центар со околу 270 жители, но неговиот пад започнал со пропаста на локалната индустрија за овчарство и укинувањето на возовите. Денес, градот има само двајца жители, сопственичките Џо Корнел и Керол Јароу, кои по три години живот во оваа изолација, решиле да се вратат во Бризбејн поради семејни причини и пензионирање, пренесува „Мирор“.
Иако на хартија е скоро пуст, Кулади не е „град на духови“. Локалниот паб и мотелот „Foxtrap Roadhouse“ се срцето на заедницата за луѓето од околните ранчови кои патуваат и по 70 километри за да се социјализираат, да ја подигнат поштата или да каснат нешто. Сопственичките велат дека највредното нешто во ова место се токму луѓето од околината кои го одржуваат духот на градот жив.
Локалната агенција за недвижности која ја води продажбата истакнува дека Кулади нуди совршена промена на животното темпо за некој што сака мир и автентичност. Со малку хумор, агентите додаваат дека доколку само четири лица заедно го купат градот, неговото население веднаш би се удвоило.
© Vecer.mk, правата за текстот се на редакцијата
