Иако Витаминот Д е суштински за нашето здравје, неговата прекумерна употреба може да предизвика сериозни компликации, пишува „Science Alert“.
Научниците предупредуваат дека популарноста на суплементите доведе до пораст на случаи на токсичност, особено кај децата и постарите лица. Проблемот настанува кога високите дози предизвикуваат хиперкалцемија – состојба каде калциумот се таложи во артериите и меките ткива наместо во коските. Ова може да резултира со камења во бубрезите, мускулна слабост, гадење, па дури и долготрајно оштетување на виталните органи доколку навреме не се препознаат симптомите.
Експертите од Харвард препорачуваат дневна доза од 600 до 800 ИЕ за повеќето возрасни лица, нагласувајќи дека не треба да се надминува границата од 4.000 ИЕ без лекарски надзор. Повеќето случаи на труење се резултат на грешки во дозирањето или користење на небезбедни суплементи. Затоа, лекарите потсетуваат дека сонцето обезбедува дури 90% од потребниот Витамин Д, а остатокот најбезбедно е да се надомести преку храна како масна риба. Пред да посегнете по додатоци во исхраната, консултацијата со стручно лице е клучна за да се избегнат несаканите ефекти.
© Vecer.mk, правата за текстот се на редакцијата
